ანტარქტიდაზე ცივი ზამთარი აშშ-ში - მოსახლეობას მოუწოდებენ, გარეთ გასვლისგან თავი შეიკავონ

აშშ-ში ძლიერ ყინვას ელოდებიან. CNN წერს, რომ 6 შტატში საფოსტო მიწოდება შეწყდება. განსაკუთრებულ უამინდობას ილინოისში, აიოვაში, მინესოტაში, ჩრდილოეთ დაკოტაში, სამხრეთ დაკოტაში, ვისკონსინში, კანზასში, მისურიში, მონტანასა და ნებრასკაში ელოდებიან.

მინესოტაში -70 გრადუსამდე ყინვას ვარაუდობენ, ქართან ერთად. რამდენიმე შტატში მოსახლეობას მოუწოდეს, სახლები არ დატოვონ.

„ყინვა ძალიან საშიშია, შესაძლოა, მოყინვაც გამოიწვიოს და ამისთვის 5 წუთიც საკმარისი იქნება. მაქსიმალურად შეზღუდეთ გარეთ ყოფნის დრო,“ - ნათქვამია ამინდის ეროვნული სააგენტოს განცხადებაში.

უამინდობის გამო სამშაბათსა და ოთხშაბათს 2700-ზე მეტი ფრენა გადაიდო.

ჩიგაკოში ხუთშაბათს რეკორდულად დაბალი ტემპერატურა, -27 გრადუსი იქნება - უფრო ცივი, ვიდრე ანტარქდიტის ნაწილზე. მაგალითად - CNN წერს, რომ ანტარქტიდაზე, პრისლის მყინვარზე ტემპერატურა ახლა -7 გრადუსია.

ჩრდილოეთ დაკოტაში მაღაზიები და ოფისების უმეტესი ნაწილი დაკეტილია, მხოლოდ რამდენიმე მარკეტი და გაზგასამართი სადგური მუშაობს.