რუსული არყის 90 000 ბოთლი კიმ ჩენ ინისთვის მიჰქონდათ, თუმცა ევროპამ დიქტატორი სასმელის გარეშე დატოვა

ჰოლანდიელმა მესაზღვრეებმა როტერდამის პორტში 90 000 არყის ბოთლის კონფისკაცია მოახდინეს. „გარდიანი“ წერს, რომ არაყი ჩრდილოეთ კორეის ლიდერისა და მისი სამხედრო მაღალჩინოსნებისთვის იყო განკუთვნილი.

ჰოლანდიელი სამართალდამცველების თქმით, რუსული არაყი ჩინურ სატვირთო გემ „ნებულაზე“ აღმოაჩინეს.

3 ათას ყუთში მოთავსებული არაყი ჰამბურგისა და როტერდამის პორტების გავლით ჩინეთში უნდა ჩასულიყო. მოგვიანებით კი, წინასწარი გამოძიების თანახმად, ალკოჰოლური სასმელს ფხენიანში გადაიტანდნენ.

საბაჟოს ოფიცერი არნო კოოიჯი მედიასთან დეტალებზე არ საუბრობს, თუმცა ამბობს, რომ არაყი სანქციების ფონზე ჩრდილოეთ კორეისთვის იყო განსაზღვრული.

ჰოლანდიის ვაჭრობის მინისტრის განცხადებით კი მათ სრული უფლება ჰქონდათ, ამოეღოთ ალკოჰოლით დატვირთული კონტეინერი, რადგან ჩრდილოეთ კორეის მიმართ დაწესებული სანქციების დაცვა ძალიან მნიშვნელოვანია.

კიმ ჩენ ინს, რომელმაც განათლება შვეიცარიაში მიიღო, მდიდრული და უზრუნველი ცხოვრება უყვარს. გასულ წელს ფუფუნების სხვადასხვა ნივთის შესაძენად ჩინეთში მან 4 მლნ დოლარზე მეტი დახარჯა. გავრცელებული ინფორმაციით, კიმის ოჯახმა ჩინეთში საზღვაო შვეულმფრენი, მუსიკალური ინსტრუმენტები, საათები და ბეწვეული შეიძინა. ერთი ოჯახისთვის იმპორტირებულმა საქონელმა 2017 წელს ქვეყნის სრული იმპორტის 17.8 % შეადგინა.