"სინამდვილეში, არავითარი რუსები არ გადმოსულან" - რას ყვებიან ადგილობრივები და რა ხდება ხურვალეთში, იქ, სადაც ჟურნალისტებს არ უშვებდნენ

ამ წუთებში ხურვალეთში, სოფლის ცენტრში ადგილობრივი მოსახლეობის ერთი ნაწილია შეკრებილი. ამის შესახებ ადგილიდან „ინტერპრესნიუსის“ კორესპონდენტი იუწყება, რომელმაც დაახლოებით ერთი საათის წინ, სოფელში შესვლა შეძლო.

ნახეთ ვიდეო: "არავითარი რუსები არ გადმოსულან, ეს იყო ცრუ ინფორმაცია" - პირველი კომენტარი იმ ადგილიდან, სადაც ქართველ ჟურნალისტებს არ უშვებენ

ადგილობრივების განცხადებით, სოფელში სრული სიმშვიდეა, ოკუპირებული ტერიტორიიდან შეიარაღებული პირების გადმოსვლას ადგილი არ ჰქონია და შესაბამისად, გავრცელებული ინფორმაცია, თითქოს შეიარაღებული ფორმიანები ხურვალეთელების ეზოებსა და ბაღებში იმყოფებიან, სრული სიცრუეა.

შეკრებილები აცხადებენ, რომ აღნიშნული პროვოკაციული ინფორმაციების გავრცელება გარკვეული პირების ინტერესებში შედის, ამიტომ პროვოკაციების თავიდან ასაცილებლად და სტაბილური ვითარების შესანარჩუნებლად, ისინი მოუწოდებენ ხელისუფლებას და ძალოვან უწყებებს, შესაბამისი რეაგირება მოახდინონ იმ პირების მიმართ, რომლებიც პროვოკაციულ განცხადებებს აკეთებენ და სიცრუეს ტირაჟირებენ.

"გარეთ რომ გამოვედი, ასეთი არეული სიტუაცია იყო. ეს ყველაფერი გამოიწვია ინტერნეტით ხელოვნურად გავრცელებულმა ინფორმაციამ. სინამდვილეში, არავითარი რუსები არ გადმოსულან და არც დაგვინახავს რუსები, ვიღაცა ერთობა მსგავსი სიტუაციებით, მაგრამ ჩვენზე ეს ძალიან მოქმედებს. ამიტომ ვინც ეს ჩაიდინა, აგოს პასუხი", - აცხადებს ერთ-ერთი ადგილობრივი.

შეგახსენებთ, რომ სოფელ ხურვალეთამდე მისასვლელი გზა ამ დრომდე გადაკეტილი იყო. მედიის წარმომადგენლებს იქ შესვლის საშუალება მხოლოდ რამდენიმე წუთის წინ მისცეს.