მეგან მარკლი უარს ამბობს სამშობიაროზე, სადაც ქეით მიდლტონმა იმშობიარა - ჰერცოგინია 40 წლიან ტრადიციას არღვევს

მეგან მარკლი სამეფო ოჯახის ტრადიციებს ხშირად არღვევს, არც მისი მშობიარობა იქნება გამონაკლისი. ბრიტანული მედიის ინფორმაციით, ქეით მიდლტონის, პრინცესა დაიანას და ოჯახის სხვა წევრებისგან განსხვავებით, ის სამშობიაროში Lindo Wing არ იმშობიარებს.

37 წლის ჰერცოგინია 40 წლიან ტრადიციას არღვევს. მან სამშობიარო უინძორში მდებარე საკუთარ სახლთან ახლოს შეარჩია, მშობიარობა კი უკვე ნებისმიერ დროს არის მოსალოდნელი.

ქეით მიდლტონმა პრინცესა დაიანასა და სამეფო ოჯახის სხვა წევრების მსგავსად სამივე შვილი Lindo Wing-ში გააჩინა. მშობიარობიდან რამდენიმე საათში კი ისინი ბავშვებით ხელში ფოტოკამერების წინ პოზირებდნენ.

The Sun-ის ინფორმაციით, წყვილს სურს, მშობიარობამ რაც შეიძლება უხმაუროდ ჩაიაროს.

„ჰარიმ და მეგანმა იციან, რომ ბავშვის მიმართ ინტერესი დიდია, თუმცა ახალშობილი ბრიტანეთის ტახტის მემკვიდრე არ იქნება, ამიტომ სურთ, მშობიარობამ ზედმეტი აჟიოტაჟის გარეშე ჩაიაროს,“ - ამბობს გამოცემის წყარო.

მისივე თქმით, მეგანი ღელავს შესაძლო გართულებების გამოც, როგორიც არის, მაგალითად - საკეისრო კვეთა, ამიტომ არ სურს იძულებული გახდეს მშობიარობიდან რამდენიმე საათის შემდეგ ფოტოკამერების წინ სამშობიაროს კიბეებზე გამოჩნდეს.