ექიმებმა ქალი სასწრაფოს მანქანაში ამშობიარეს - "დედა 29 წლისაა... ახალშეძენილი გოგონა მეხუთე შვილია"

ზუგდიდი რაიონის სოფელ ჯვარის სასწრაფო სამედიცინო დახმარების ექიმებმა 29 წლის ქალი მანქანაში ამშობიარეს. შემთხვევა დღეს მოხდა. როგორც მედდამ ნანი გოგოხიამ AMBEBI.GE-ს უამბო, პაციენტი მესტიის სოფელ იბლიანიდან მოჰყავდათ და მას გზაში მშობიარობა დაეწყო.

მედდის თქმით, 29 წლის ქალს გოგონა ეყოლა და დედა-შვილი თავს კარგად გრძნობენ.

„მესტიის სოფელ იბლიანიდან გადმოიყვანეს პაციენტი, გზად შემოგვაგებეს. ერთი კილომეტრიც არ გვქონდა გავლილი და ქალს დაეწყო მშობიარობა. ჩემთვის ეს არ იყო პირველი შემთხვევა, თუმცა ჩემთან ერთად ვინც იყო, იმ ექიმისთვის ეს პროცესი პირველი იყო და ძალიან ბედნიერია. 29 წლის არის დედა, ახალშეძენილი გოგონა მისი მეხუთე შვილია. ახალშობილი 3 კგ და 300 გრამი დაიბადა“, - გვითხრა ჯვარის სასწრაფო დახმარების მედდამ.

დედა-შვილი სასწრაფომ ზუგდიდის რეფერალურ ჰოსპიტალში გადაიყვანა.