აფეთქებების შედეგად მსხვერპლი 290-მდე გაიზარდა - შემზარავი ფოტომასალა შრი-ლანკიდან

შრი-ლანკაში მომხდარი ტერორისტული თავდასხმების შედეგად გარდაცვლილთა რაოდენობამ 290-ს მიაღწია, ამის შესახებ BBC წერს. აფეთქებები ეკლესიებსა და სასტუმროებში გუშინ მოხდა, როდესაც კათოლიკური სამყარო აღდგომას ზეიმობდა.

პოლიციის ინფორმაციით, 24 ადამიანი დააკავეს, თუმცა ჯერ კვლავ უცნობია, ვინ დგას ტერაქტების მიღმა, რომლის შედეგად 500-მდე ადამიანი დაშავდა, გარდაცვლილთა შორის უცხო ქვეყნების ათობით მოქალაქეა.

პირველი ნაღმები ადგილობრივი დროით 08:45 საათზე აფეთქდა, სულ მალე 6 აფეთქების შესახებ გავრცელდა ინფორმაცია.

თავდასხმის ობიექტი ნეგომბოს, ბატიკალოასა და კოლომბოს კოჩჩიკადეს დასახლებებში მდებარე სამი ეკლესია გახდა, სადაც სააღდგომო წირვა აღევლინებოდა. სულ მალე კი ქვეყნის დედალაქალაქში სასტუმროები „შანგრილა“, „კინგსბერი“ და „სინამონ გრანდ ჰოტელი“ აფეთქდა.

პოლიცია თავდამსხმელებს დაედევნა, თუმცა ამ დროს კიდევ ორი აფეთქება მოხდა. მოგვიანებით კი ცნობილი გახდა, რომ ბომბი იპოვეს დედაქალაქში მდებარე ქვეყნის მთავარ აეროპორტთანაც.

რომელი ექსტრემისტული ჯგუფი დგას ტერაქტების უკან, ჯერჯერობით, კვლავ უცნობია, თუმცა საქმეზე 24 ადამიანი დააკავეს. ხელისუფლება ვარაუდობს, რომ აფეთქებებში თვითმკვლელი ტერორისტებიც მონაწილეობდნენ. „ბიბისის“ ჟურნალისტი, აზამ ამინი, რომელიც კოლომბოში იმყოფება, წერს, რომ სამართალდამცველებს ეჭვი რადიკალ ისლამისტებზე აქვთ. ხელისუფლება მოუწოდებს საზოგადოებას, გამოძიების დასრულებამდე სიმშვიდე შეინარჩუნონ.

შეზღუდვებია დაწესებული სოციალური ქსელების მომხმარებლებისთვისაც, მოქმედებს კომენდანტის საათი.

გარდაცვლილთა უმეტესობა შრი-ლანკელია. ქვეყნის საგარეო საქმეთა მინისტრის თქმით, მსვერპლთა შორის არიან 36 ქვეყნის მოქალაქეები, ბევრის იდენტიფიცირება ჯერ ვერ მოხერხდა.

გარდაცვლილ უცხო ქვეყნის მოქალაქეებს შორის არიან სულ მცირე 5 ბრიტანელი, სამი დანიელი, ერთი პორტუგალიელი, სამი ინდოელი, ორი თურქი, ერთი ჰოლანდიელი და ერთი იაპონელი.