გლოვის დღე და მასობრივი დაკრძალვა შრი-ლანკაში - გარდაცვლილთა რაოდენობა 310-მდე გაიზარდა

შრი-ლანკაში გლოვის დღეა, ქვეყანაში ტერაქტების შედეგად გარდაცვლილებს კრძალავენ.

BBC-ის ინფორმაციით, გარდაცვლილთა რაოდენობა 310-მდე გაიზარდა. შრი-ლანკას მთავრობის განცხადებით, აფეთქებების უკან ადგილობრივი ისლამისტური დაჯგუფება თაუჰიდ ჯამათი დგას. პოლიციამ 40 ეჭვმიტანილი დააკავა.

დაკრძალვის ცერემონიალი წმინდა სებასტიანის ეკლესიაში შედგა - ტაძარი კვირას თავდასხმის ერთ-ერთი ობიექტი იყო.

დღეს დილით კი - 8.30 საათზე - იმ დროს, როდესაც კათოლიკურ აღდგომას შრი-ლანკაში პირველი 6 ბომბი ამოქმედდა, წუთიერი დუმილი გამოცხადდა - დროშები დაეშვა და ხალხმა თავის დახრითა და დუმილით მიაგო პატივი აფეთქებების დროს გარდაცვლილებსა და 500 დაშავებულს.

საგანგებო მდგომარეობა პოლიციას საშუალებას აძლევს, ეჭვმიტანილები სასამართლოს განჩინების გარეშე დააკავონ. ხელისუფლებამ დაბლოკა წვდომა „ფეისბუქზე“, „ინსტაგრამსა“ და WhatsApp-ზე.

ტერორისტების თავდასხმის ობიექტი კვირას ნეგომბოს, ბატიკალოასა და კოლომბოს კოჩჩიკადეს დასახლებებში მდებარე სამი ეკლესია გახდა, სადაც სააღდგომო წირვა აღევლინებოდა. სულ მალე კი ქვეყნის დედალაქალაქში სასტუმროები „შანგრილა“, „კინგსბერი“ და „სინამონ გრანდ ჰოტელი“ აფეთქდა. გარდაცვლილთა უმეტესობა შრი-ლანკელია. ქვეყნის საგარეო საქმეთა მინისტრის თქმით, მსხვერპლთა შორის არიან 36 ქვეყნის მოქალაქეები, ბევრის იდენტიფიცირება ჯერ ვერ მოხერხდა.