ბიძინა ივანიშვილის და ირმა ინაშვილის რეიტინგი გათანაბრდა - რა აჩვენა NDI-ის კვლევამ

NDI-ის ბოლო კვლევის თანახმად, "ქართული ოცნების" ლიდერსა და ყოფილ პრემიერ-მინისტრს, ბიძინა ივანიშვილს და "პატრიოტთა ალიანსის" ლიდერს ირმა ინაშვილს თანაბარი, 21%-იანი რეიტინგი აქვთ.

ეს ერთ-ერთი ყველაზე დაბალი სარეიტინგო პროცენტია ეროვნულ-დემოკრატიული ინსტიტუტის მიერ ჩატარებულ გამოკითხვაში, რომელშიც პოლიტიკოსების მიმართ მოსახლეობის დამოკიდებულებაა ასახული. რეიტინგში ბიძინა ივანიშვილს ალეკო ელისაშვილი, ზაალ უდუმაშვილი, გრიგოლ ვაშაძე და მისივე ხელისუფლების მინისტრებიც კი უსწრებენ.

NDI-ის კვლევით პოლიტიკოსების რეიტინგში ჯანდაცვის მინისტრი დავით სერგეენკო და თბილისის მერი კახა კალაძე ლიდერობენ.

უფრო კონკრეტულად, გამოკითხული რესპონდენტის 40% ამბობს, რომ სერგეენკოს მიმართ დადებითი დამოკიდებულება აქვს, 12% უარყოფით დამოკიდებულებას აფიქსირებს, 32% კი - არც დადებითს და არც უარყოფითს.

რესპონდენტთა 40% აფიქსირებს დადებით დამოკიდებულებას კახა კალაძის მიმართაც, 18%-ს მის მიმართ უარყოფითი დამოკიდებულება აქვს. 34% კალაძის მიმართ დამოკიდებულებას არც დადებითად და არც უარყოფითად აფასებს.

პოლიტიკოსების მიმართ დამოკიდებულების რეიტინგში მესამე ადგილზეა მიხეილ სააკაშვილი, რომლის მიმართაც დადებით დამოკიდებულებას გამოკითხულთა 31% აფიქსირებს.

შემდეგ პოზიციებზე მოდიან პოლიტიკოსები: შალვა ნათელაშვილი, სალომე ზურაბიშვილი და გრიგოლ ვაშაძე, რომელთა მიმართ დადებითი დამოკიდებულება გამოკითხულთა 28-28%- ს აქვს.

27-27% გამოხატავს დადებით დამოკიდებულებას გიორგი გახარიას და ზაალ უდუმაშვილის მიმართ, 26-26% კი - ალეკო ელისაშვილის, მამუკა ბახტაძის და თეა წულუკიანის.

22-22%-ია დადებითად განწყობილი გიორგი ვაშაძის და ნიკა მელიას მიმართ, 21-21% კი - ირმა ინაშვილის, ბიძინა ივანიშვილის და დავით უსუფაშვილის.

20% აფიქსირებს დადებით განწყობას ირაკლი კობახიძის მიმართ.