ავტორი:

დავით სარალიძის ჯგუფურად მკვლელობაში გ.ჯ. დამნაშავედ ცნეს - ზაზა სარალიძის კომენტარი

დავით სარალიძის ჯგუფურად მკვლელობაში გ.ჯ. დამნაშავედ ცნეს - ზაზა სარალიძის კომენტარი

თბილისის სააპელაციო სასამართლომ ხორავას ქუჩაზე მომხდარი მკვლელობის საქმეზე პირველი ინსტანციის სასამართლოს განაჩენში ცვლილებები შეიტანა.

თბილისის სააპელაციო სასამართლოს მოსამართლეთა პალატამ ნაწილობრივ შეცვალა საქალაქო სასამართლოს გადაწყვეტილება და რამდენიმე წუთის წინ გამოცხადებული განაჩენით, გ.ჯ. დამნაშავედ ცნეს დავით სარალიძის მკვლელობაში ჯგუფურად, სხვა პირებთან ერთად.

რაც შეეხება გ.ბ.-ს, სააპელაციო სასამართლოს გადაწყვეტილებით, გ.ბ.-ს მომაწილეობა არ მიუღია დავით სარალიძის მკვლელობაში. სააპელაციო სასამართლომ ძალაში დატოვა საქალაქო სასამართლოს გადაწყვეტილება ლევან დადუნაშვილის მკვლელობასთან დაკავშირებით და დამნაშავედ ცნო გ.ბ.

2017 წლის პირველ დეკემბერს, ხორავას ქუჩაზე მომხდარი მკვლელობის საქმეზე, რომელსაც ორი მოზარდის, დავით სარალიძისა და ლევან დადუნაშვილის სიცოცხლე ემსხვერპლა, ორი არასრუწლოვანი - გ.ჯ. და გ.ბ. არის მსჯავრდებული.

თბილისის საქალაქო სასამართლოს გადაწყვეტილებით, გ.ჯ.-ს 9 წლითა და 9 თვით თავისუფლების აღკვეთა, ხოლო გ.ბ.-ს 10 წლითა და 6 თით თავისუფლების აღკვეთა აქვს შეფარდებული. საქალაქო სასამართლოს აღნიშნული გადაწყვეტილებით, გ.ჯ. ცნობილ იქნა დავით სარალიძის განზრახ მკვლელობის მცდელობაში, ხოლო, გ.ბ. ლევან დადუნაშვილის განზრახ მკვლელობაში.

თბილისის საქალაქო სასამართლოს გადაწყვეტილება როგორც დაცვის, ასევე ბრალდების მხარემ გაასაჩივრა. პროკურატურა გ.ბ.-სა და გ.ჯ.-ს დავით სარალიძის მკვლელობაში დამნაშავედ ცნობას ითხოვდა. გ.ჯ.-ს ადვოკატები მუხლის კვალიფიკაციის შეცვლას ითხოვდნენ, კერძოდ, კი, გ.ჯ.-ს დავით სარალიძის სხეულის განზრახ დაზიანებაში დამნაშავედ ცნობას, გ.ბ.-ს შემთხვევაში კი, მის სრულად გამართლებას.

ეს არის ნაწილობრივ სამართლის აღდგენა. ბრძოლა ისევ გრძელდება ბოლომდე. ყველა აგებს კანონის წინაშე პასუხს. არავის არაფერს შევარჩენ, - ამის შესახებ ხორავას ქუჩაზე მოკლული დავით სარალიძის მამამ ზაზა სარალიძემ, სააპელაციო სასამართლოს განაჩენის გამოცხადების შემდეგ განაცხადა.

ზაზა სარალიძემ ყველას მოუწოდა მისი ოჯახის პოლიტიკურად გამოყენებისგან თავი შეიკავონ.

„ეს იყო სამართლის აღდგენის პირველი უდიდესი ნაწილი. წელიწადნახევრის განმავლობაში ჩემი ბრძოლა ძალიან კარგად იცით. პირველად გამიჩნდა იმის შეგრძნება, რომ სამართალი უნდა აღდგეს აუცილებლად, მაგრამ ეს არ ნიშნავს საბოლოოდ სამართლის აღდგენას. ეს არის ნაწილობრივ სამართლის აღდგენა. ბრძოლა ისევ გრძელდება ბოლომდე. არავინ იფიქროს რომ ან მოვდუნდები ან გვერდზე გავიწევი. მოვუწოდებ ხელისუფლებას, რომ ძალიან ცოტა დრო აქვს დარჩენილი. ეს ბრძოლა არ გაჩერდება. ყველა აგებს კანონის წინაშე პასუხს. არავის არაფერს შევარჩენ! მოვუწოდებ ყველა ადამიანს, თავი შეიკავონ ყველანაირად ჩემი შვილის და ჩემი ოჯახის პოლიტიკურად გამოყენებისგან. ჩემზე უკეთ არავინ იცის ჩემი შვილი როგორ დავიცვა“, - განაცხადა სარალიძემ.

სასამართლოს ამ გადაწყვეტილებით, ჯერ კიდევ კითხვის ნიშნის ქვეშ დარჩა ყველაზე მნიშვნელოვანი საკითხი, ვინ არიან ის პირები, ვინც დავით სარალიძე მოკლეს, - ამის შესახებ „ინტერპრესნიუსს" დავით სარალიძის ჯგუფურად განზრახ მკვლელობაში მსჯავრდებული არასრულწლოვნის გ.ჯ.-ს ადვოკატმა, ტარიელ კაკაბაძემ.

მისი განმარტებით, კვლავ დაუდგენელია, იმ პირების ვინაობა, ვინც დავით სარალიძის მკვლელობაში მონაწილეობა მიიღეს.

„ორივე არასრულწლოვანს ბრალი ედებოდა დავით სარალიძის ჯგუფურად მკვლელობის ჩადენაში. დადგინდა, რომ ერთ-ერთ არასრულწლოვანს საერთოდ არ ჰქონდა დავით სარალიძის მკვლელობაში მონაწილეობა მიღებული. რაც შეეხება მეორეს, ის დამნაშავედ იქნა ცნობილი ჯგუფურად ჩადენილი განზრახ მკვლელობის მუხლით. ისმის ძალიან მარტივი კითხვა, ვინ არიან ის პირები, ვისთან ერთადაც მან მონაწილეობა მიიღო აღნიშნულ დანაშაულში, თუ მეორე არასრულწლოვანს საერთოდ არ მიუღია მონაწილეობა. მარტვი კითხვაა, რომელსაც ვერც სასამართლო და ვერც საგამოძიებო ორგანო ვერ პასუხობს. ეს იმას ნიშნავს, რომ მკვლელობის ჩამდენი პირები არც კი არიან პასუხისგებაში მიცემული", - განაცხადა კაკაბაძემ.

მისივე განმარტებით, სასამართლოს დღევანდელი გადაწყვეტილება ნიშნავს იმას, რომ მოწმე მიხეილ კალანდიას ჩვენება მოსამართლეთა პალატამ არ გაიზიარა.

"სასამართლომ საერთოდ არ გაიზიარა მიხეილ კალანდიას ჩვენება. ის გახლავთ მოწმე, რომელზეც დგას ბრალდების დადგენილება, ის არის პროკურატურის ოქროს მოწმე. სასამართლომ ჩვენი პოზიცია გაითვალისწინა იმასთან დაკავშირებით, რომ კალანდიას ჩვენებები ურთიერთგამომრიცხავია და ეწინააღმდეგება, როგორც სხვა პირთა ჩვენებებს, ასევე მტკიცებულებებს, რომელიც საქმეშია.

თბილისის სააპელაციო სასამართლომ თქვა, რომ მკვლელობაში მონაწილეობა მიღებული აქვთ ისეთ პირებს, რომლებიც პასუხისგებაში არ არიან მიცემული და საგამოძიებო ორგანოს მიერ გამოვლენილი არ არიან. საქმე არ არის სწორად გამოძიებული და ის, რაც ბრალდების დადგენილებაშია მითითებული, დიდწილად განსხვავდება ჭეშმარიტებისგან, გვაქვს გონივრული მოლოდინი, რომ საგამოძიებო ორგანო შეეცდება ამის შემდეგ მაინც გამოასწოროს დაშვებული შეცდომები და პასუხისგებაში იქნება მიცემული ის პირები, რომლებმაც დანაშაული ჩაიდინეს", - განაცხადა კაკაბაძემ.

ნიშნავს, თუ არა სასამართლოს დღევანდელი გადაწყვეტილება იმას, რომ შესაძლოა, მიხეილ კალანდია დააკავონ, ადვოკატი პასუხობს, რომ გამოვლენილია კონკრეტული პირი, ვინც დავით სარალიძის მკვლელობაში მონაწილეობა მიიღო, თუმცა, ის ამ დრომდე დაკავებული არ არის.

"უდანაშაულობის პრეზუმფციის დარღვევა არ მინდა, თუმცა, მიმაჩნია, რომ გამოვლენილია კონკრეტული პირი, ვინც დავით სარალიძის მკვლელობაში მონაწილეობა მიიღო და სამწუხაროდ, ეს პიროვნება პასუხისგებაში არ არის მიცემული.

დაცვის მხარე ელოდება, რომ დანაშაულის რეალურად ჩამდენი პირი პასუხისგებაში იქნება მიცემული და დაკავებული. ნათლად გამოიკვეთა, რომ სხვა პირების მიმართ გაცილებით მეტი მტკიცებულება არსებობს, ვიდრე იმ მსჯავრდებულების მიმართ, რომლებთანაც დღეს განაჩენი დადგა", - აღნიშნავს კაკაბაძე.

თბილისში ცნობილ ნეიროქირურგს სცემეს - "ათასობით ადამიანის გადამრჩენს ვიღაც ველური ცემს..."

შსს-ს გაფრთხილება აქციის მონაწილეებს - უწყება განცხადებას ავრცელებს

"მთავარი არხის" ერთ-ერთი დამფუძნებელი გიორგი რურუა დააკავეს