"ჩატარდა ექსტრემისტული აქცია, ანგარიშსწორების მუქარით... ისინი მოითხოვდნენ ჩემს გადაცემას" - რას ჰყვება გავრილოვი პარლამენტში განვითარებულ მოვლენებზე

მართლმადიდებლობის საპარლამენტთაშორისო ასამბლეის სხდომა თბილისში შეწყვეტილია რადიკალების ექსტრემისტული აქციით. ყველა დელეგაციამ დატოვა პარლამენტის შენობა და ახლა უსაფრთხო ადგილას იმყოფებიან. უახლოეს ორ საათში იგეგმება მუშაობის განახლება, - განუცხადა „რია ნოვოსტის“ სერგეი გავრილოვმა.

„მხედველობაში უნდა მივიღოთ, რომ პარლამენტში ჩატარდა ექსტრემისტული აქცია ანგარიშსწორების მუქარით, რუსეთის პრეზიდენტის და დელეგაციების დისკრედიტაციის მცდელობით. ისინი მოითხოვდნენ ჩემს გადაცემას, თითქოს მე ვმონაწილეობდი კონფლიქტში აფხაზეთში. მე განვაცხადე, რომ არასდროს მიმიღია მონაწილეობა არანაირ სამხედრო კონფლიქტში, არც აფხაზეთში, არც ნებისმიერ სხვა ქვეყანაში“, - განაცხადა გავრილოვმა.

მისივე განცხადებით, მათ ამ პირობებში მუშაობის გაგრძელება არ შეუძლიათ, რადგან მუქარა იყო სხვადასხვა ქვეყნიდან ყველა დელეგატის მიმართ. ყველა დელეგაციამ დავტოვეთ სხდომათა დარბაზი. კოლეგებმა ჩვენ მხარი დაგვიჭირეს - რომ რუსეთის გარეშე არ შეიძლება სხდომის ჩატარება. მე, როგორც ამ ასამბლეის პრეზიდენტი ჩავატარებ ამ სხდომას, რადგან ის დანიშნული იყო და ბევრი ქართველი დეპუტატი ჩვენ მხარს გვიჭერს“, - განუცხადა მან „რია ნოვოსტის“.

სერგეი გავრილოვის განცხადებთ, რუსი პარლამენტარების საქართველოში ჩასვლის წინ გავრცელდა "ფეიკნიუსი" იმის თაობაზე, რომ ის აფხაზეთში და დნესტრისპირეთის ომების მონაწილეა. სერგეი გავრილოვმა ეს ბრალდება უარყო და აღნიშნა, რომ არასდროს მიუღია მონაწილეობა რაიმე სამხედრო კონფლიქტში. გავრილოვმა ხაზი გაუსვა, რომ „რუსეთს და საქართველოს აერთიანებს ძმური მართლმადიდებლური კავშირი“. ამასთან ერთად რუსი დეპუტატი მიიჩნევს, რომ ახლა „ყველა მოლაპარაკება რუსეთსა და საქართველოს შორის სხვადასხვა ჰუმანიტარულ და ეკონომიკურ საკითხებზე ჩაშლის საფრთხის ქვეშ არის“.

„ახლა დელეგაციის წევრები შევიკრიბებით იმის განსახილველად, თუ როგორ გავაგრძელოთ მართლმადიდებლობის საპარლამენტთაშორისო სხდომის მუშაობა“, - აღნიშნა გავრილოვმა.