ფოთელმა ქალმა სასწრაფოს მანქანაში იმშობიარა - "მანქანის დაძვრიდან 10 წუთში დაეწყო მშობიარობა..."

ფოთში, ქალმა სასწრაფო-სამედიცინო დახმარების მანქანაში იმშობიარა.

როგორც AMBEBI.GE-სთან ექიმმა ისაუბრა, ბავშვი მაშინ დაიბადა, როდესაც ორსული ფოთიდან სენაკის სამშობიარო სახლში გადაყავდათ. დედა და შვილი თავს კარგად გრძნობენ.

"შემოვიდა გამოძახება, რომ ორსულ ქალბატონს ასტკივდა მუცელი. ბრიგადა დროულად მივიდა და ადგილზე გაუწია პირველადი დახმარება, შემდეგ კი მოათავსეს მანქანაში, რათა საავადმყოფოში გადაეყვანათ.

მანქანის დაძვრიდან დაახლოებით 10 წუთში დაიწყო მშობიარობა. ჯგუფმა წარმატებით გაართვა თავი და დაიბადა გოგონა, ოჯახისთვის მეორე შვილია. დედა და შვილი ჰოსპიტალიზირებული არიან სენაკის სამშობიარო სახლში" - განაცხადა ფოთის სასწრაფო-სამედიცინო დახმარების ცენტრის მენეჯერმა კესო გელენიძემ.

მისი თქმით, მას შემდეგ რაც ფოთში სამშობიარო სახლი დაიხურა, მსგავსი შემთხვევა ხშირად ხდება და სასწრაფო დახმარების ბრიგადები თავს წარმატებით ართმევენ.

ავტორი: მაია ძაგანია