ავარია თუშეთში: სატვირთო, რომელშიც 12 ადამიანი იმყოფებოდა, ხევში გადავარდა

თუშეთის გზის 23-ე კილომეტრზე, „კამაზის“ ტიპის მანქანა ხევში გადავარდა.

წინასწარი ინფორმაციით, მანქანაში 12 ადამიანი იმყოფებოდა, საიდანაც ხუთმა გადმოხტომა მოასწრო, 7 კი სატვირთოსთან ერთად ხევში, 400 მეტრი სიმაღლიდან გადავარდა.

სატვირთო მანქანაზე მყოფები ახმეტის მუნიციპალიტეტის სოფელ ქვემო ალვანის მცხოვრებლები არიან. არსებული ინფორმაციით, ისინი თუშეთობის დღესასწაულზე დასასწრებლად სოფელ ომალოში მიემგზავრებოდნენ.

შემთხვევის ადგილზე უკვე მიდიან სამაშველო და სასწრაფო დახმარების ბრიგადები. სხვა დეტალები უცნობია.

როგორც „ინტერპრესნიუსს“ საგანგებო სიტუციების მართვის სამსახურში განუცხადეს, ავტოსაგზაო შემთხვევასთან დაკავშირებით მათთან შეტყობინება შევიდა, რის შემდეგაც ადგილზე რამდენიმე სამაშველო ჯგუფი გავიდა.

მათივე თქმით, დაშავებულების შესახებ ინფორმაცია ჯერჯერობით უცნობია.