"ამბობენ, რომ თავი ბასრი საგნით აქვს დასერილი" - თემქაზე მოკლული ქალის მეზობლები შემთხვევის ახალ დეტალებს ყვებიან

თემქაზე, ზღვისუბანში 62 წლის ქალი სავარაუდოდ, ბლაგვი საგნის ჩარტყმითაა მოკლული.

როგორც მეზობლები ამბობენ, მოკლული 62 წლის სიმა მირზოევაა. შუახნის ქალს მეუღლე და ორი შვილი ჰყავს, რომლებიც შემთხვევის ადგილზე ტრაგედიის შემდეგ მივიდნენ. ერთი შვილი გარდაცვლილს საზღვარგარეთ ჰყავს.

ადგილობრივები მირზოევას და მის ოჯახს დადებითად ახასიათებენ და ამბობენ, რომ მათ არავისთან კონფლიქტი და დაძაბულობა არ ჰქონიათ, შესაბამისად უჭირთ თქმა, რა შეიძლებოდა გამხდარიყო 62 წლის ქალის მკვლელობის მიზეზი.

"დაახლოებით 11:30 საათისთვის შევამჩნიეთ კვამლი სახლში, მეზობლებმა გამოიძახეს მაშველები, მოვიდნენ და ნახეს გარდაცვლილი ქალი. თავის არეში აქვს მიყენებული დარტყმა. ქალი მეუღლესთან ერთად ცხოვრობდა. დღეს მეუღლე სამსახურში წავიდა და ამ პერიოდში მოხდა ეს ამბავი.

დავურეკეთ მეუღლეს, რომელმაც კარები გააღო და ნახა ეს ამბავი. პოლიცია ამბობს, რომ ქალს თავი ბასრი საგნით აქვს დასერილი", - განუცხადა "ინტერპრესნიუსს" მეზობელმა ეთერ იმერლიშვილმა.