„ნუ იქნები ხისტი და სულელი! ისტორია სატანად შეგრაცხავს" - დონალდ ტრამპის ეს წერილი ერდოღანმა სანაგვეში მოისროლა

თურქეთის პრეზიდენტმა ამერიკელი კოლეგისგან მიღებული წერილი სანაგვეში გადააგდო, ინფორმაციას BBC ავრცელებს.

9 ოქტომბრით დათარიღებულ წერილში დონალდ ტრამპი რეჯეპ ტაიპ ერდოღანს ურჩევდა, „არ ყოფილიყო სულელი“ :

„ნუ იქნები ხისტი და სულელი! შეგვიძლია, კარგი გარიგება დავდოთ. შენ არ გსურს ათასობით ადამიანის სისხლისღვრაზე იყო პასუხისმგებელი, ისევე როგორც მე არ მსურს, თურქეთის ეკონომიკის განადგურებაზე ვიყო პასუხისმგებელი - და მე ვიქნები.

ისტორია დაგიფასებს, თუკი ამას სწორად და ჰუმანურად გააკეთებ, მაგრამ შეგრაცხავს სატანად, თუ მოვლენები კარგად არ განვითარდება. ნუ იქნები ხისტი, ნუ იქნები სულელი!

მოგვიანებით დაგირეკავ,“ - წერდა ტრამპი.

საპასუხოდ, როგორც „ბიბისისთან“ თურქული წყაროები ამბობენ, პრეზიდენტმა მიღებული წერილი სანაგვეში მოისროლა.

თურქეთმა ჩრდილოეთ სირიაზე თავდასხმა გასულ კვირას დაიწყო. ოფიციალური პირების განცხადებით, ქურთები, რომლებიც დიდი ხნის განმავლობაში აშშ-ს მოკავშირეები იყვნენ „ისლამურ სახელმწიფოსთან“ ბრძოლაში, ტერორისტები არიან. თავდასხმა კი მას შემდეგ დაიწყო, რაც დონალდ ტრამპმა ტერიტორიიდან ამერიკელი ჯარისკაცების გაყვანის ბრძანება გასცა.