ავტორი:

"საქართველოს ვარსკვლავში" ცნობილი კონკურსების ფავორიტებსაც ვიხილავთ - "სიმღერა არ მაკლია, მაგრამ „ევროვიზიაზე“ მოხვედრა ძალიან გამიხარდება"

"საქართველოს ვარსკვლავში" ცნობილი კონკურსების ფავორიტებსაც ვიხილავთ - "სიმღერა არ მაკლია, მაგრამ „ევროვიზიაზე“ მოხვედრა ძალიან გამიხარდება"

დღეს „პირველი არხის“ ეთერში მუსიკალური მეგა-შოუ „საქართველოს ვარსკვლავის“ მეორე სეზონი იწყება. გამარჯვებულს ჟიური მაყურებელთან ერთად გამოავლენს და ის წარადგენს საქართველოს „ევროვიზიის“ სიმღერის კონკურსზე.

მსოფლიოს მთავარ მუსიკალურ კონკურს „ევროვიზიაზე“ მოხვედრა ნებისმიერი მუსიკოსის ოცნებაა, ასე, რომ „საქართველოს ვარსკვლავის“ ამ სეზონზე შევხვდებით როგორც უცნობ, ასევე ნაცნობ კონკურსანტებსაც. პროექტში ვიხილავთ „იქს ფაქტორის“ ბრილიანტად წოდებულ თორნიკე ყიფიანს. შოუს მან 2014 წელს მოიგო და საკუთარი ნიჭიერებით მთელ საქართველოს დაამახსოვრა თავი.

თუმცა, ამ წლებში სასცენო აქტიურობით არ გამოირჩეოდა და დიდ სცენას და ეკრანსაც ახლა უბრუნდება.

AMBEBI.GE მუსიკალური პროექტის რამდენიმე კონკურსანტს დაუკავშირდა და შოუს დაწყებამდე მათი ემოციების შესახებ ჰკითხა:

თორნიკე ყიფიანი: „ევროვიზიაზე“ რომ მოვიგოთ ძალიან კარგი იქნება, ეს პროექტი კი ამის არაჩვეულებრივ შანსს იძლევა. მნიშვნელობა არ აქვს ვინ წავა საქართველოდან, მაგრამ ბევრი მეუბნება მე თუ წავალ კონკურსზე, გამარჯვების მეტი შანსი გვექნება. სიმღერა ნამდვილად არ მაკლია, მაგრამ თუ მოვხვდები „ევროვიზიაზე“ ძალიან გამეხარდება.

- ძლიერი კონკურენტები გყავს?

- ძლიერი კონკურენტები მყავს, თითქმის ყველა პროფესიონალია, ცნობილი და გამოცდილი. მე ადრეც არავის აღვიქვამდი კონკურენტად, რადგან ხელოვნებაში ყველა ინდივიდუალურია და მომენტს გააჩნია, ვინ მოხიბლავს მოცემულ სიტუაციაში მსმენელს.

- რას პირდები გულშემატკივრებს?

- აუცილებელ გამარჯვებას ვერავის შევპირდები, მაგრამ რაც შემიძლია ყველაფერს გავაკეთებ. სანამ „საქართველოს ვარსკვლავში“ ვიქნები შევასრულებ როგორც ძველ, ასევე ახალ სიმღერებსაც.

- რას საქმიანობდი ამ პროექტამდე?

- ვსწავლობდი, პროგრამები ვისწავლე ელექტრონული მუსიკის გასაკეთებლად, მინდა თანამედროვე ჟღერადობა ჰქონდეს ჩემს მუსიკას. ნელნელა ვაუმჯობესებ ჩემს შემოქმედებას, დანარჩენს დრო გვიჩვენებს.

პროექტში ვიხილავთ კონკურსების კიდევ ერთ ცნობილ მომღერალს ბარბარა სამხარაძეს. ის მსმენელს და მაყურებელს პატარა გოგონა ახსოვს, რომელმაც „ნიჭიერი“ მოიგო, თუმცა ახლა უკვე გაიზარდა და მაყურებელს სულ სხვა ჟანრში შესთავაზებს თავს.

- მე „ნიჭიერის“ გამარჯვებული ვარ, საიდანაც მსმენელს პატარა გოგონა ვახსოვარ. განვითარების დიდ საშუალებას იძლევა "საქართველოს ვარსკვლავი". წარმატება მხოლოდ ბინა და მანქანა ხომ არ არის? უდიდესი შანსი გეძლევა, „ევროვიზიაზე“ შეგიძლია წარადგინო საკუთარი ქვეყანა.

- ნერვიულობდით „საქართველოს ვარსკვლავის“ კასტინგზე?

- არ მეგონა ასე თუ ვინერვიულებდი. ყველა მეუბნებოდა, შენ სანერვიულო რა გაქვსო, მე კი ეს უფრო დიდ პასუხისმგებლობას მაძლევდა.

- რას საქმიანობდი „ნიჭიერიდან“ „საქართველოს ვარსკვლავამდე“?

- როცა პროექტი მოვიგე სკოლის მოსწავლე ვიყავი. ვსწავლობ ერთ-ერთ უნივერსიტეტში, მაგრამ ახლა პროექტის გამო აკადემიური ავიღე, სწავლის გარდა ვწერდი სიმღერებს და დავწერე წიგნი. ეს არის დრამის ჟანრის წიგნი, საიდანაც სულ სხვანაირ ბარბარას გაიცნობს მკითხველი.

პროექტს რაც შეეხება, რაც არ უნდა ჩავიცვა და დავიხურო, ყველას ის 15 წლის გოგო ახსოვს, რომელიც "გამოტყაპუნდა" სცენაზე. მე უკვე პატარა გოგონა აღარ ვარ, მხოლოდ ჯაზის ჟანრშიც აღარ ვმღერი. დანარჩენს კი ტელევიზიით იხილავს მაყურებელი.

მაყურებელს დიდ სიახლეებს ვპირდები, ჯერ გადაწყვეტილი არ არის რას ვიმღერებ, მაგრამ იმედი მაქვს იმედგაცრუებულს არავის დავტოვებ.

"...ეს სამი პროდუქტი ანადგურებს ორგანიზმს" - მაია კაჭკაჭიშვილი მისივე აღმოჩენილ დიეტაზე, რომელსაც სხვებსაც ასწავლის

რა ცვლილებები ელის "საქართველოს ვარსკვლავის" მეორე სეზონში მაყურებელს - "წელს გვყავს ძალიან ბევრი ნიჭიერი ახალგაზრდა, მათ შორის, ცნობილებიც"

"პირველ სეზონზე რბილები ვიყავით, ახლა უფრო მომთხოვნები ვიქნებით" - "მასტერშეფის" მეორე სეზონი იწყება!