ავტორი:

"რასაც ამბობს ბატონი ბიძინა, ყოველთვის სიმართლეა" - მთავრობის წევრები ივანიშვილს ხეების გადარგვისთვის აქებენ

"რასაც ამბობს ბატონი ბიძინა, ყოველთვის სიმართლეა" - მთავრობის წევრები ივანიშვილს ხეების გადარგვისთვის აქებენ

"ოცნების" ხელისუფლების წარმომადგენლების თქმით, ბიძინა ივანიშვილმა დენდროლოგიურ პარკში გადარგული ხეები გადაშენებას გადაარჩინა. ბიძინა ივანიშვილის მიერ დენდროლოგიური პარკის განაშენიანების შესახებ ჟურნალ "ველური ბუნებისთვის" მიცემულ ინტერვიუსთან დაკავშირებით, ჟურნალისტებმა დღეს შეკითხვები ხელისუფლების რამდენიმე წარმომადგენელს დაუსვეს.

ეკონომიკისა და მდგრადი განვითარების მინისტრის ნათია თურნავას განცხადებით, "რა თქმა უნდა, ბიძინა ივანიშვილმა ეს ხეები გადაშენებას გადაარჩინა":

"უნიკალურ პარკს აკეთებს. ზოგადად, ბევრი ხე არის მოუვლელი. კეთდება ძალიან კარგი რამ, რომელიც ყველასთვის ხელმისაწვდომი იქნება," - განაცხადა თურნავამ.

თბილისის მერის, კახა კალაძის თქმით კი, დენდროლოგიური პარკი "ძალიან მაგარი გამოდის":

"ხეები სადაც გადაირგო, შემიძლია გითხრათ, რომ ძალიან მაგარი სივრცე კეთდება. სამუშაოების ნაწილი დასრულებულია. პარკი გადეცემა სახელმწიფოს და იქ ნებისმიერ ადამიანს ექნება შესაძლებლობა შევიდეს, დაისვენოს. ძალიან მაგარი გამოდის. უფრო მეტსაც ვიტყოდი, ქვეყანაში ჩვენ ბევრი ასეთი სივრცე გვჭირდება", - განაცხადა კალაძემ.

ფოტო: გამოცემა "ველური ბუნება"

"რასაც ამბობს ბატონი ბიძინა, ყოველთვის სიმართლეა" - ამის შესახებ ვიცე- პრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა განაცხადა ივანიშვილის ინტერვიუს შეფასებისას.

"ვიცი რა ბატონი ბიძინა ივანიშვილის დამოკიდებულება და მისი საქველმოქმედო პროექტები, დარწმუნებული ვარ, რომ ყველა მისი საქმე მიმართულია სოციალური ამოცანის შესრულებისკენ.

როდესაც ვსაუბრობთ ხეების გადარგვის საკითხზე, ბევრი არაკეთილმოსურნე მავნებლურ და დამანგრეველ საქმიანობად წარმოჩენას ცდილობდა, სინამდვილეში ამ ხეების გადარგვა იმისთვის ხდებოდა, რომ გურიის რეგიონს კიდევ ერთი ღირშესანიშნაობა შემატებოდა - დენდროლოგიური პარკი, რომლის მსგავსიც საქართველოში არაა,“ - განაცხადა ცქიტიშვილმა.

ბიძინა ივანიშვილმა გამოცემა „ველურ ბუნებასთან“ ინტერვიუში დენდროლოგიურ პარკებთან დაკავშირებით ისაუბრა და განაცხადა რომ, ეს ხეები გადაარჩინა, რადგან უმეტესი მათგანი უკვე გადაშენების პირას იყო:

"ჩემთვის პირადად, ბუნება არის ენერგიის უმთავრესი წყარო. სადაც არ ვცხოვრობდი, ყოველთვის ვცდილობდი ქალაქიდან თავი დამეღწია და ბუნებასთან ახლოს ვყოფილიყავი, რასაც მეტ-ნაკლებად ვახერხებდი. ამის შესაძლებლობა ყველა ჩვენგანს უნდა ჰქონდეს და ყოველი ამ პარკის შექმნითა და თანადგომით მე ზუსტად ამ შესაძლებლობების შექმნას ვცდილობ.

გიგანტური ხეების გადატანას მრავალი ეპითეტი მოუგონეს, თუმცა მინდა გითხრათ, რომ მე ეს ხეები გადავარჩინე, რადგან უმეტესი მათგანი უკვე გადაშენების პირას გახლავთ.

შემიძლია გითხრათ, რომ მე ასი ათასობით ხე მაქვს დარგული, შეიძლება ამას ჩემი ჰობი დაარქვათ ან მოთხოვნილება, მაგრამ ყველაფერში ნეგატივის დანახვა და ხალხისთვის სიცრუის ტირაჟირება ამ ქვეყანაში უნდა დასრულდეს" - აღნიშნა ივანიშვილმა „ველურ ბუნებასთან“ ინტერვიუში.

"...სხვა ინვესტორებიც საერთაშორისო სასამართლოში დავას დაიწყებენ" - როგორ განვითარდება მოვლენები ანაკლიის კონსორციუმის გარშემო

გიორგი გახარია - "წყალმომარაგების პრობლემა ბაკურიანსა და გუდაურში უნდა მოგვეგვარებინა, ეს არ უნდა მომხდარიყო"

"ბოდიში ყველა დამსვენებელს, ვისაც პრობლემები შეექმნა წყალმომარაგებასთან დაკავშირებით" - ცქიტიშვილის განმარტება გუდაურსა და ბაკურიანში უწყლობაზე