რა პრეპარატმა დააყენა უსიამოვნო სუნი პარლამენტში - აქტივისტები "საპროტესტო ხსნარის" ფოტოს ავრცელებენ

სამოქალაქო მოძრაობა "სირცხვილიას" ინფორმაციით, "საპროტესტო ხსნარი", რომელიც პარლამენტის სხდომათა დარბაზში გამოიყენეს, ჯანმრთელობისთვის სრულიად უსაფრთხოა. მოძრაობის "ფეისბუქის" გვერდზე გავრცელდა ფოტოც, რომელზეც ხსნარის ბოთლია ასახული.

ეს ხსნარია АCД фракция 2 ანუ ანტისეპტიკი სტიმულატორი დოროგოვისა. მისი შექმნა ალექსეი დოროგოვის სახელს უკავშირდება.

"საპროტესტო ხსნარი, რა თქმა უნდა, არის სრულიად უვნებელი და უსაფრთხო, არ არის ალერგიული და სუნის შეყნოსვისას არ გააჩნია გვერდითი ეფექტები. საჯაროდ გამოყენებამდე აღნიშნული ნივთიერება გამოიცადა საგანგებო პირობებში" - აღნიშნულია "სირცხვილიას" მიერ გავრცელებულ განცხადებაში.

აღწერის მიხედვით, АCД фракция 2 ორგანული ანტისეპტიკური პრეპარატია, რომელსაც თერაპიული მოქმედება აქვს. ძირითადად იყენებენ ვეტერინარიაში, შინაური ცხოველების და ფრინველების საჭმლის მომნელებელი სისტემების დაავადების დროს, ასევე სასუნთქი ორგანოების პრობლემის დროს. ამასთან, ასმევენ დაავადებაგადატანილ შინაურ ცხოველებს მოსაძლიერებლად.

პრეპარატი 1947 წელს შეიქმნა ექსპერიმენტალური ვეტერინარიის ლაბორატორიაში (ВИЭВ) მეცნიერ ალექსეი დოროგოვის მიერ. დოროგოვი ნედლეულად ბაყაყებს იყენებდა, ქსოვილის თერმულად გადამუშავების შემდეგ მიღებულ კონდესანტს, გააჩნდა ანტისეპტიკური, მასტიმულირებელი და აღმდგენი თვისებები.

სხვათაშორის, აღნიშნულ პრეპარატს ამჟამად რუსეთის მხოლოდ ორი ქარხანა უშვებს - არმავირის და მოსკოვის.

პარლამენტის უმრავლესობის დეპუტატების განცხადებით, ნივთიერების დასხმის შედეგად შეუძლოდ 4 ადამიანი გახდა, მათ შორის დეპუტატები და საკანონმდებლო ორგანოს თანამშრომლები არიან. დაშავებულებს სუნთქვის პრობლემები აღენიშნებათ. ერთ-ერთ მათგანს სპეციალური სასუნთქი აპარატის გამოყენება დასჭირდა.

ირაკლი კობახიძის ინფორმაციით, ოპოზიციის წარმომადგენელმა სხდომათა დარბაზში გაურკვეველი ნივთიერება შეიტანა და დაასხა, რის გამოც, დეპუტატებმა დარბაზი დატოვეს.

ამასთან, პარლამენტის პრესსამსახურში გამორიცხავენ, რომ სხდომათა დარბაზში მომხდარი ფაქტის უკან მოძრაობა „სირცხვილია“ იდგეს.

როგორც „ინტერპრესნიუსს“ პარლამენტის პრესსამსახურში განუცხადეს, საკანონმდებლო ორგანოში დღეს დეპუტატების, აპარატის თანამშრომლებისა და აკრედიტებული ჟურნალისტების გარდა არც ერთი უცხო პირი არ შესულა, რადგან საშვით შესვლის რეჟიმი არ მოქმედებს.

შინაგან საქმეთა სამინისტრომ პარლამენტის სხდომათა დარბაზში გაურკვეველი ნივთიერების დასხმის ფაქტზე გამოძიება უკვე დაიწყო.