"მარიხუანას აქტიური მომხმარებელია, ერთი თვის წინ კომაში იყო" - რას ყვება ადვოკატი ბრალდებულზე, რომელმაც გურიაში 80 წლის ქალი გააუპატიურა და მოკლა

80 წლის ქალის მკვლელობისა და გაუპატიურების ბრალდებით დაკავებულმა 20 წლის ახალგაზრდამ დანაშაული აღიარა. სასტიკი შემთხვევა პირველ იანვარს, სოფელ თხილნარში მოხდა.

ბრალდებულის ადვოკატმა დავით მამალაძემ AMBEBI.GE-ს შემთხვევის დეტალები უამბო. მისი ინფორმაციით, სოფელ მელექედურში მცხოვრებმა ზვიად დოლიძემ ახალი წლის ღამეს მეზობლის ეზოდან ავტომობილი მოიპარა, ბიძას "აკუმულატორი" მოჰპარა და ავტომობილის ნაწილების გასაღებაში დახმარება მეგობრებს სთხოვა.

მას შემდეგ რაც მოპარული ნივთები გაყიდა, დოლიძე გვიან ღამით საკუთარი ბებიის სოფელში მივიდა, სადაც მეზობლის - 80 წლის იზოლდა ხელაძის სახლში შევიდა, მოხუცი ქალი გააუპატიურა, შემდეგ კი მოკლა.

"ჯერჯერობით საკმარისი მტკიცებულებები არ არის ეჭვების დასადასტურებლად და ამ ეტაპზე დაცვის პოზიციიდან ვერაფერს გეტყვით, მაგრამ ბრალდებული თავად აღიარებს დანაშაულს.

გარდაცვლილი 80 წლის იზოლდა ხელაძე ბრალდებულის ბებიის მეზობელი იყო. სწორედ მის სახლში აღმოაჩინეს ზვიად დოლიძის მიერ გატაცებული ავტომობილი. ამბობს, რომ მან მოკლა ქალბატონი და გააუპატიურა კიდეც. თუმცა, იმის გათვალისწინებით, რომ იგი მარიხუანის აქტიური მომხმარებელია და დაახლოებით ერთი თვის წინ კომაში იყო მარიხუანის ზედმეტი მოხმარების გამო, ეჭვქვეშ დგას მისი ფსიქიკური ჯანმრთელობის საკითხი.

დანიშნულია ექსპერტიზები, მათ შორის გაუპატიურების ფაქტზეც. 13 თებერვალს არის წინასასამართლო პროცესი ჩანიშნული და წესით უნდა იყოს მაშინ ექსპერტიზის დასკვნები.

საშინელი ფაქტი მოხდა და ამ საქმეში დამნაშავე ვართ თითოეული ჩვენგანი, მთელი საზოგადოება, სახელმწიფო ხელისუფლების ოთხივე შტო, მათ შორის მედიასაშუალებებიც, რომლებიც მუდმივად აგიტაცია-პროპაგანდას უწევენ მარიხუანას ლეგალიზებას, გარყვნილ ქმედებას, საშინელებაა" - აცხადებს ადვოკატი.

ბრალდებულს აღკვეთი ღონისძიების სახით ორთვიანი წინასწარი პატიმრობა შეეფარდა. ადვოკატი დავით მამალაძე AMBEBI.GE-სთან საუბარში ამბობს, რომ წინასწარი პატიმრობა არ გაუსაჩივრებიათ, რადგან თავად ბრალდებულს სურდა პატიმრობაში დარჩენა.

საქმეს შინაგან საქმეთა სამინისტრო იძებს 109-ე მუხლის 1 ნაწილის "ქ" ქვეპუნქტით, რაც დამამძიმებელ გარემოებაში განზრახ მკვლელობას გულისხმობს და ქურდობისა და გაუპატიურების მუხლებით.