"ორი შესანიშნავი ადამიანი კარგ წყვილს ვერ ქმნის" - ირინა შეიკი ბრედლი კუპერთან დაშორების მიზეზებზე ალაპარაკდა

სუპერმოდელი ირინა შეიკი მსახიობ ბრედლი კუპერთან დაშორების შესახებ პირველად საუბრობს. 34 წლის ირინა მარტოხელა დედაა. ის 45 წლის მსახიობს, ბრედლი კუპერს გასულ წელს დაშორდა.

წყვილი ოთხი წელი ხვდებოდა ერთმანეთს და საერთო შვილი, ორი წლის გოგონა, ლეა შეიკ კუპერი ჰყავთ.

"ვფიქრობ, ყველა ნორმალურ ურთიერთობაში შენ წარმოაჩენ შენს საუკეთესო, ასევე შენს ცუდ თვისებებს - ეს ადამიანის ბუნებაა“, - ამბობს ირინა ბრიტანული Vogue-სთვის მიცემულ ახალ ინტერვიუში.

ის მიიჩნევს, რომ კარგ ადამიანებს კარგი წყვილის შექმნა უჭირთ და დაშორების მიზეზად სწორედ ამას ასახელებს.

"ორი შესანიშნავი ადამიანი ვერ ქმნის კარგ წყვილს. ვფიქრობ, ორივე ჩვენგანი იღბლიანები ვართ იმ გამოცდილების გამო, რომელიც ერთად მივიღეთ", - ამბობს ირინა.

შეიკისა და ბრედლი კუპერის დაშორებას სხვადასხვა მიზეზით ხსნიდნენ. ტაბლოიდები წერდნენ, რომ ამის მიზეზი ლეიდი გაგასა და ბრედლის სასიყვარულო ურთიერთობა იყო, თუმცა თავად მსახიობი და მომღერალი ყოველივეს უარყოფდნენ.

ირინა და ბრედლი შვილს ერთობლივად ზრდიან და პასუხისმგებლობებს ინაწილებენ. ორივე მათგანი ამბობს, რომ ამ თვალსაზრისით მათ შორის ჰარმონიული ურთიერთობაა.