"75%-ს თანმდევი დაავადება ჰქონდა, უმეტესობა მამაკაცია" - როგორია კორონავირუსით გარდაცვლილთა სტატისტიკა და მკურნალობის რა მეთოდს მიაგნეს ტაილანდში

ჩინეთის ეროვნული ჯანდაცვის კომისიის სახელმწიფო ჯანდაცვის ადმინისტრაციის ინფორმაციით, ახალი კორონავირუსის სიკვდილიანობის მაჩვენებელი 2,1%-ია. მათივე ცნობით, დაღუპულთა 80% 60 წელს აღემატება, ხოლო 75%-ს თანმდევი დაავადება ჰქონდა. გარდაცვლილთა ორი-მესამედი მამაკაცია.

ადმინისტრაციის დირექტორის მოადგილე, ჯიაო იაჰუი აცხადებს, რომ ვირუსის განსაკუთრებით მწვავე შემთხვევები ასაკოვან ადამიანებში ვლინდება.

მისივე თქმით, ვირუსის განკურნებისთვის საშუალოდ 9 დღეა საჭირო, თუმცა ჰუბეის პროვინციაში, სადაც მწვავე შემთხვევების დიდი რაოდენობა ფიქსირდება, მკურნალობას 20 დღეზე მეტი სჭირდება.

ტაილანდში აცხადებენ, რომ აივ ინფექციის სამკურნალო პრეპარატებისა და გრიპის წამლების კომბინაციით, ახალი კორონავირუსისგან უკვე მეორე პაციენტი განკურნეს. ჯანდაცვის მინისტრის, ანუტინ ჩარნვირაკულის თქმით, 71 წლის ქალბატონი, რომელიც უკვე განიკურნა, ახალი კორონავირუსით იყო ინფიცირებული და ძალიან რთული მდგომარეობა ჰქონდა.

ამასთან, ინფიცირებულთა რაოდენობა მთელი მსოფლიოს მასშტაბით იზრდება. ამ დროისთვის ვირუსის ლაბორატორიულად დადასტურებული შემთხვევა 20 438 ადამიანს აქვს, რაც წინა დღის მაჩვენებელზე 18%-ით მეტია. დაღუპული ადამიანების რიცხვმა კი 425-ს მიაღწია.