თინა ბოკუჩავა და ელენე ხოშტარია პარლამენტის იურიდიულ კომიტეტზე ივანიშვილის გამოსახულებიანი ნიღბებით მივიდნენ

იურიდიულ საკითხთა კომიტეტის სხდომაზე, სადაც გენერალური პროკურორობის კანდიდატის ირაკლი შოთაძის მოსმენა უნდა დაწყებულიყო ხმაურია.

"ევროპული საქართველოს“ წევრი ელენე ხოშტარია და „ნაციონალური მოძრაობის“ წევრი თინა ბოკუჩავა სხდომაზე ბიძინა ივანიშვილის გამოსახულებიანი ნიღბებით მივიდნენ, რასაც კომიტეტის სხდომაზე ხმაური მოჰყვა.

ხოშტარია კომიტეტის სხდომაზე სიის დარიგებას ცდილობს, რომელიც მისი თქმით, პოლიტპატიმრების სიაა. მას კომიტეტის თავმჯდომარემ წესრიგის დაცვისკენ მოუწოდა.

"ეს არის „ნაციონალური მოძრაობის“ და მათი სატელიტი პარტიების გაკოტრებული სახე; საზოგადოება ამას ყველაფერს ხედავს და არჩევნებზე განაჩენს გამოუტანს" - ასეთი შეფასება გააკეთა პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა სხდომაზე, რომელიც ხმაურის გამო ვერ დაიწყო.

კომიტეტის თავმჯდომარემ, ანრი ოხანაშვილმა ტექნიკური შესვენებაც გამოაცხადა, თუმცა, სხდომა შესვენების ამოწურვის შემდეგაც ვერ განახლდა.