უხანში კორონავირუსით საავადმყოფოს დირექტორი გარდაიცვალა - რა ხდება ვირუსის აფეთქების ზონაში

ჩინეთის ქალაქ უხანში, კორონავირუსით დაავადებული პაციენტების მკურნალობისთვის განკუთვნილი კლინიკის დირექტორი კორონავირუსით გარდაიცვალა, ამის შესახებ სააგენტო "როიტერსი“ ჩინურ მედიაზე დაყრდნობით წერს.

ლიუ ზიმინგი სამედიცინო დაწესებულების პირველი ხელმძღვანელია, რომელიც ახალი ტიპის კორონავირუსს ემსხვერპლა. ის სპეციალურად კორონავირუსით დაავადებულთათვის გახსნილ ერთ-ერთ დროებით საავადმყოფოს ხელმძღვანელობდა,

ჩინეთის ქალაქი უხანი კორონავირუსის ეპიცენტრია. ქალაქი ჩაკეტილია და იქ 23 იანვრიდან კარანტინია გამოცხადებული. ბოლო ცნობებით, ადამიანებს სახლიდან გამოსვლა ეკრძალებათ. დაცარიელებულია ქალაქის ქუჩები.

ურთულეს პირობებში უწევთ მუშაობა უხანელ ექიმებს. ისინი 24 საათის განმავლობაში სპეციალური სამოსითა და პირბადეებით არიან აღჭურვილნი, რაც თავის მხრივ, მძიმე გავლენას ახდენს მათ სხეულზე. ვრცელდება ფოტოები, თუ როგორი შეშუპებული აქვთ ხელები და სახე, ხოლო კანზე ნაწიბურებია გაჩენილი.

ოფიციალური მონაცემებით, ამ დროისთვის ახალი ტიპის კორონავირუსით 1 873 ადამიანია გარდაცვლილი, განკურნებულია 12 803, ხოლო დაინფიცირებულია 73 335 ადამიანი. კორონავირუსი ჩინეთის გარდა გავრცელდა მსოფლიოს 30-მდე ქვეყანაში, მათ შორის, აშშ-ში, დიდ ბრიტანეთში, საფრანგეთში, რუსეთში, გერმანიასა და იტალიაში.

მედიკოსები ვირუსის საწინააღმდეგო ვაქცინაზე მუშაობენ, თუმცა, ვერ აკონკრეტებენ, ზუსტად როდის შექმნიან მას. მსოფლიო ჯანდაცვის ორგანიზაციის ხელმძღვანელის, ტედროს ადჰანომ გებრეიესუსის განცხადებით, კორანივირუსის წინააღმდეგ მიმართული პირველი ვაქცინა შეიძლება 18 თვეში იყოს ხელმისაწვდომი.