რა უნდა გაითვალისწინოთ მოგზაურობისას, რომ კორონავირუსით არ დაინფიცირდეთ

კორონავირუსის ახალი შემთხვევების რაოდენობა ყოველდღე იზრდება და უფრო მეტ ქვეყანაში დასტურდება. ბოლო ინფორმაციით, ვირუსი უკვე მსოფლიოს 84 ქვეყანაშია გამოვლენილი. რთულია იმის განსაზღვრა, თუ სადამდე მივალთ და რა გველის, მაგრამ ერთი რამ, რაც დანამდვილებით შეგვიძლია ვთქვათ ისაა, რომ ახალი ტიპის ვირუსი მოგზაურებისთვის ნამდვილ კოშმარად იქცა.

ვირუსის საფრთხის გამო გაუქმდა, ან გადაიდო ფრენები, ხშირ შემთხვევაში კი, დაინფიცირების თავიდან ასაცილებლად ადამიანები თავად ამბობენ უარს ფრენაზე. მსოფლიოს სხვადასხვა ქვეყნებში დაიხურა მუზეუმები და გაუქმდა კონცერტები.

ჯანდაცვის მსოფლიო ორგანიზაცია, დაავადებათა კონტროლის ეროვნული ცენტრი მოუწოდებს საზოგადოებას თავი შეიკავონ იმ ქვეყნებში მოგზაურობისგან, სადაც კორონავირუსით ინფიცირებულთა რაოდენობა დიდია. ამ ეტაპზე ასეთი ქვეყნებია - ჩინეთი, სამხრეთ კორეა, იტალია და ირანი.

თუმცა, თუ სხვა ქვეყანაში მიფრინავთ, ვირუსისგან თავის დასაცავად უნდა გაითვალისწინოთ ის რეკომენდაციები, რომელთა შესახებაც ხშირად ვისმენთ ინფორმაციას დაავადებათა კონტროლის ცენტრის წარმომადგენლებისგან.

ჯანდაცვის მსოფლიო ორგანიზაციის რეკომენდაციები მოგზაურებისთვის:

• ხშირად დაიბანეთ ხელები. განსაკუთრებით მას შემდეგ, რაც შეხვდებით ადამიანს რესპირატორული დაავადების სიმპტომებით. ხელების ჰიგიენა მოიცავს ხელების დაბანას საპნითა და წყლით, ასევე ალკოჰოლის შემცველი პროდუქტით დამუშავებას;
• აიფარეთ ცხვირსა და პირზე ხელსახოცი როცა გახველებთ, ან გაცემინებთ და თუ თქვენ გვერდით მყოფს ახველებს, ან აცემინებს, სასწრაფოდ გაეცალეთ და დაიცავით ხელების ჰიგიენის წესები;
• არ შეეხოთ პირსა და ცხვირს;
• რეკომენდებულია კვების ჰიგიენის დაცვაც;
• აუცილებელია, რომ მოგზაურებმა, რომლებიც თავიანთ ქვეყანაში დაბრუნდებიან იმ არეალიდან, სადაც კორონავირუსია გავრცელებული, 14 დღის განმავლობაში მოახდინონ თვითიზოლაცია და მიჰყვნენ თავიანთ ქვეყანაში შემუშავებულ პროტოკოლის წესებს;
• თუ გამოხატულია ვირუსის სიმპტომები, როგორებიცაა ტემპერატურის მომატება, ან სუნთქვის პრობლემები, აუცილებლად მიმართეთ ექიმს, მოუყევით მოგზაურობის ისტორია;

როგორცAMBEBI.GE-ს საქართველოს აეროპორტების გაერთიანებაში უთხრეს, რეკომენდაციები ნებისმიერი მიმართულებით მიმავალი მგზავრისთვის ერთნაირია.

"სველი დამუშავებით, ქლორით დეზინფექცია უტარდება აეროპორტის შენობას, გახსნილი არის კარვები, სადაც მოწმდებიან მგზავრები, ეს მგზავრები საიდანაც მოფრინავენ, იქაც გადიან შემოწმებას, ანუ ყველა ჯერზე მოწმდებიან.

ზუსტად იგივე რეკომენდაციები გვაქვს, რასაც მოუწოდებს საზოგადოებას ჯანდაცვის მსოფლიო ორგანიზაცია, დაავადებათა კონტროლის ცენტრი - თუ გადაუდებელი აუცილებლობა არ აქვთ, თავი უნდა შეიკავონ იტალიაში, ირანში, ჩინეთში, სამხრეთ კორეაში მოგზაურობისგან.

დანარჩენ შემთხვევაში, მოგზაურისთვის, არამოგზაურისთვის, სახმელეთო გზით შემომსველელისთვის, თუ ქვეყანაში ფეხით მოსიარულე ადამიანისთვის რეკომენდაციები ერთი და იგივეა.

მოგზაურებს, თუ ეპიდემიის ქვეყნებიდან მოდიან, კიდევ უფრო მეტი სიფრთხილე მართებთ, რადგანაც არ დააინფიცირონ სხვა ადამიანები, მათ უნდა გაითვალისწინონ დაავადებათა კონტროლის ცენტრის რეკომენდაციები“, - აცხადებენ აეროპორტების გაერთიანებაში.

• რა შემთხვევაში აგინაზღაურდებათ თვითმფრინავის ბილეთის ღირებულება?

თუ ფრენა ავიაკომპანიამ თავად გააუქმა, ის ბილეთის ღირებულებას 100%-ით აანაზღაურებს.

"დანარჩენს რაც შეეხება, თუ დავუშვათ კორონავირუსის შიშის გამო ადამიანმა თავისი სურვილით თქვა უარი ფრენაზე, ამ შემთხვევაში, დაიბრუნებს თუ არა მგზავრი ბილეთის თანხას, დამოკიდებულია ავიაკომპანიის პოლიტიკაზე.

ვიღაც შეიძლება 30%-ს აბრუნებდეს, ვიღაც საერთოდ არ აბრუნებდეს, ან ცვლიდეს და ა.შ. ეს თავიდან ბოლომდე ავიაკომპანიის კომპეტენციაა“, - გვეუბნებიან აეროპორტების გაერთიანებაში.

• საინფორმაციო კამპანია მგზავრებისთვის

საქართველოს აეროპორტებში არის სპეციალური ბანერები, ბილბორდები კორონავირუსის შესახებ და თავის დაცვის ხერხებზე, ჰიგიენის წესებზე.

"ჩვენს თანამშრომლებს ამასთან მიმართებაში ჩაუტარდათ ტრენინგები და მაქსიმალურად იცავენ წესებს იმიტომ, რომ თვითონაც უშუალო შეხება აქვთ მგზავრებთან და შემდეგ ოჯახებში მიდიან" - ამბობენ აეროპორტების გაერთიანებაში.

კორონავირუსს მსოფლიოს სხვადასხვა ქვეყანაში ებრძვიან. ვირუსი თავდაპირველად ჩინეთის ქალაქ უხანში გაჩნდა, სადაც ამ დრომდე კარანტინია გამოცხადებული. ბოლო ინფორმაციით ახალი კორონავირუსით დაღუპულთა რაოდენობა 3 285-მდე გაიზარდა, გამოჯანმრთელებული პაციენტების რიცხვი კი - 53 688-ია.

კორონავირუსით იტალიაში 107 ადამიანია დაღუპული, ირანში - 92, სამხრეთ კორეაში - 35, იაპონიაში - 12, აშშ-ში - 11, საფრანგეთში -4, ჰონგ-კონგში, ესპანეთსა და ერაყში - ორ-ორი, ტაივანში, ავსტრალიაში, ტაილანდსა და ფილიპინებში კი ვირუსს თითო ადამიანის სიცოცხლე ემსხვერპლა.

რაც შეეხება საქართველოს, ჩვენს ქვეყანაში ბოლო ინფორმაციით, კორონავირუსის 4 დადასტურებული შემთხვევაა გამოვლენილი. ოთხივე მათგანი საქართველოს მოქალაქეა. ორი ქვეყანაში ირანიდან, ხოლო ორი პაციენტი იტალიიდან შემოვიდა.