ყალბი ინფორმაციები, რომლებსაც უცხოური და ქართული მედიასაშუალებები კორონავირუსთან დაკავშირებით ავრცელებენ

ახალი ტიპის კორონავირუსი გლობალურ საფრთხედ იქცა. საზოგადოების დიდი ნაწილი პანიკაშია, რადგან ჯერჯერობით ვირუსის საწინააღმდეგო მედიკამენტები და ვაქცინა არ არსებობს. სოციალურ ქსელებში ვრცელდება ათასგვარი ინფორმაცია კორონავირუსის მკურნალობის სხვადასხვა მეთოდებზე, ინფიცირებულთა რაოდენობაზე და ა.შ. თუმცა, ხშირად მათი ნაწილი სიმართლეს არ შეესაბამება.

პანიკის ფონზე განსაკუთრებით რთულია ე.წ. ფეიკ ნიუსისა და ნამდვილი ამბის გარჩევა. სამწუხაროდ, ბევრი იჯერებს კორონავირუსთან დაკავშირებით გავრცელებულ ყალბ ინფორმაციას, პანიკა ღვივდება და ისედაც შეშინებულ საზოგადოებას, კიდევ უფრო მეტად ეშინია.

ვნახოთ კორონავირუსის შესახებ სხვადასხვა გამოცემების, მათ შორის, ქართული მედიასაშუალებების მიერ გავრცელებული ინფორმაციები, რომლებიც სინამდვილეს არ შეესაბამება.

• ყალბი ინფორმაცია #1 - "ისრაელში 30 000-მდე ადამიანი კარანტინში გადაჰყავთ"

რამდენიმე ქართულმა ინტერნეტგვერდმა გაავრცელა ინფორმაცია სათაურით - "30 000-მდე ადამიანი ისრაელში კარანტინში გადაჰყავთ". მსგავს ცნობას არ ავრცელებს არც ერთი სანდო საინფორმაციო გამოცემა. ისრაელში რეალური სურათი ასეთია: ჯანდაცვის მსოფლიო ორგანიზაციის ბოლო მონაცემებით, ქვეყანაში კორონავირუსით ინფიცირებულია სულ 17 ადამიანი. მათგან 2 გამოჯანმრთელდა, ხოლო 15 შემთხვევა კვლავ აქტიურია.

თავად ის გამოცემა, რომელიც ქართულ მედიასაშუალებებს წყაროდ მოჰყავთ, ynetnews.com წერს, რომ ისრაელში კორონავირუსი თინეიჯერს დაუდასტურდა, რომელიც 24 თებერვალს თელ-ავივის "მაკაბისა" და "აპოელის" თამაშს დაესწრო. მეცხრე კლასელი მოზარდი მატჩზე მოედნის მერვე სექტორში იმყოფებოდა და ამავე სექტორში მის გარდა დაახლოებით 5 ათასი ადამიანი იყო.

ისრაელის ჯანდაცვის სამინისტროს წარმომადგენლები ურჩევენ ამ სექტორში მსხდომებს, ორკვირიან თვითიზოლაციას მიმართონ. 30 ათასი ადამიანის კარანტინში გადაყვანაზე კი საუბარი არ არის.

ყალბი ინფორმაცია #2 - "ისრაელში კორონავირუსის საწინააღმდეგო ვაქცინა ტესტირებისთვის უკვე მზადაა"

მორიგი ფეიკ-ნიუსიც ისრაელს უკავშირდება. ინფორმაციას ამჯერად გამოცემა abomus.de.ru ავრცელებს, რაც მოგვიანებით რამდენიმე ქართულმა ვებ-გვერდმაც თარგმნა. გამოცემა წერს, რომ ვაქცინა ტესტირებისთვის უკვე მზად არის. abomus.de.ru-ს სანდო გამოცემად ვერ მივიჩნევთ, რადგანაც ამ ვებ-გვერდზე სტატიის დამატება ნებისმიერ მსურველს შეუძლია.

ამასთან, ინფორმაციას იმის შესახებ, რომ ისრაელში ვაქცინა ტესტირებისთვის უკვე მზად არის, არ ავრცელებს არც ერთი სანდო გამოცემა. სხვადასხვა გამოცემები, მათ შორის, New Yourk Post, წერენ, რომ ისრაელში მართლაც მუშაობენ ვაქცინის შექმნაზე, თუმცა რა დრო დასჭირდება მის დასრულებას და როდის დაიწყება ტესტირება, უცნობია. როგორც "ნიუ იორკ პოსტი" წერს, ვაქცინის ტესტირებაში ჩაშვებას, შესაძლოა, 90 დღე დასჭირდეს.

ოფიციალური პირები, ჯანდაცვის მსოფლიო ორგანიზაციის წარმომადგენლები ვარაუდობენ, რომ ვაქცინის შექმნას მინიმუმ ერთი წელი დასჭირდება. ეს არის რთული და ხანგრძლივი პროცესი და დაჩქარებულ პირობებშიც კი, დიდი დროა საჭირო.

კორონავირუსის საწინააღმდეგო ვაქცინის შესაქმნელად სხვადასხვა მსხვილი ფარმაცევტული კომპანიები დამოუკიდებლად მუშაობენ. მათ შორის ყველაზე დიდი მოლოდინი Johnson & Johnson-სგან აქვთ.

ვაქცინის გამოგონებაზე Forbes-ის ინფორმაციით, ასევე მუშაობს პენსილვანიის ბიოტექნოლოგიური კომპანია Inovia, ასევე, მასაჩუსეტსის ბიოტექნოლოგიური კომპანია Moderna. (გაეცანით სტატიას კორონავირუსის საწინააღმდეგო ვაქცინის შესახებ)

ყალბი ინფორმაცია #3 - "ალკოჰოლის დალევა კლავს კორონავირუსს"

ქართულ ინტერნეტსივრცეში რამდენიმე დღის წინ გავრცელდა ფოტო და ინფორმაცია იმის შესახებ, რომ ალკოჰოლის დალევა კლავს კორონავირუსს. ადამიანთა დიდი ნაწილი ამ ამბავმა გაამხიარულა, თუმცა ასევე დიდმა ნაწილმა დაიჯერა, რომ ალკოჰოლი მართლაც კლავს კორონავირუსს.

რეალობა კი ასეთია - ჯანდაცვის მსოფლიო ორგანიზაციის წარმომადგენლები ამბობენ, რომ ზედაპირული დეზინფექციისთვის ალკოჰოლი კარგია, თუმცა მისი დალევა მოკლავს თუ არა უკვე ორგანიზმში მოხვედრილ კორონავირუსს, ან დაგიცავთ თუ არა დაინფიცირებისგან, არ არის დადასტურებული და მედიკოსები არ ურჩევენ ადამიანებს მის მიღებას პრევენციისთვის.

აღნიშნულთან დაკავშირებით კომენტარი გააკეთა დაავადებათა კონტროლის ეროვნული ცენტრის ხელმძღვანელმაც:

"იყო გადმოცემები, ჭაჭა შველისო... ჭაჭა დასალევად კი არ შველის, ჭაჭა შეგიძლიათ გააზავოთ წყალში, მას ანტისეპტიკური თვისებები აქვს" - ამბობს ამირან გამყრელიძე.