"მე 65 წელზე მეტის ვარ, მაგრამ სახლში ვერ დავრჩები, უნდა ვიმუშავო" - პაატა იმნაძე

დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილის, პაატა იმნაძის განცხადებით, კორონავირუსის გავრცელების პრევენციის ფარგლებში რეკომენდაციაა, 65 წელს გადაცილებული ადამიანები სახლში დარჩნენ.

ასე გამოეხმაურა პაატა იმნაძე კითხვას, რომლის თანახმადაც, სამედიცინო დაწესებულებების ნაწილი ხანდაზმულ და ქრონიკული დაავადებების მქონე სამედიცინო პერსონალს სამუშაო ადგილებზე გამოცხადებას სთხოვენ.

"აქ ორგვარია მიდგომა. გავიხსენოთ, რომ ჩინეთში პენსიონერი ექიმები დაბრუნდნენ სამსახურებში, რომ ემსახურათ თავიანთი ქვეყნისთვის. რეკომენდაცია ყველას ეხება ერთნაირად, გინდა ექიმი იყოს ის და გინდა სხვა პროფესიის ადამიანი.

65 წელს ზემოთ ვინც არის, მაქსიმალურად სახლში უნდა დარჩნენ და არ გამოვიდნენ გარეთ! მე 65 წელზე მეტის ვარ, მაგრამ სახლში ვერ დავრჩები და უნდა ვიმუშავო“, - განაცხადა პაატა იმნაძემ.