ჭარბწონიანობა კორონავირუსის გართულების რისკს ზრდის - მედიკოსების დასკვნა

კორონავირუსით ინფიცირებულ პაციენტებში, რომლებსაც ჭარბწონიანობა აწუხებთ, ვირუსის გართულების რისკი უფრო მაღალია. ამის შესახებ თავის ანგარიშში, ანესთეზიოლოგიიის ევროპული საზოგადოების ყოფილი პრეზიდენტი, ექიმი სტეფან დე ჰერტი წერს.

დე ჰერტის დაკვირვებამ გამოავლინა, რომ ჭარბწონიანობა ერთ-ერთი ყველაზე გავრცელებული რისკ-ფაქტორია ინფიცირებულ პაციენტებში. როგორც New York Post წერს, ექიმის დაკვირვებით, ინტენსიური თერაპია, უმეტეს შემთხვევაში, სწორედ ასეთ პაციენტებს სჭირდებათ.

მედიკოსები ამბობენ, რომ ჭარბწონიანობა ასუსტებს ორგანიზმის იმუნურ სისტემას, რაც ადამიანს ურთულებს სხვადასხვა ინფექციებთან და ვირუსებთან ბრძოლას. ამიტომაც დე ჰერტის დაკვირვების შედეგი მოულოდნელი არ ყოფილა.

სტეფან დე ჰერტი ამბობს, რომ ზედმეტი კილოგრამები ასევე აძლიერებს ზეწოლას ფილტვებზე, რაც კორონავირუსის შემთხვევაში კიდევ უფრო ართულებს მდგომარეობას.

აღსანიშნავია, რომ გაერთიანებულ სამეფოშიც მედიკოსებმა აღმოაჩინეს ჭარბწონიანობის უარყოფითი გავლენა კორონავირუსთან მიმართ ადამიანის გამძლეობაზე.

ბრიტანეთში ჩატარებულმა კვლევამ აჩვენა, რომ კრიტიკულ მდგომარებაში მყოფ კორონავირუსით ინფიცირებულთა დაახლოებით 2/3 ჭარბწონიანია. ამის შესახებ Metro UK წერს.