ავსტრალიელმა მეცნიერებმა კორონავირუსის საწინააღმდეგო ორი ვაქცინის გამოცდა დაიწყეს - პირველადი შედეგი ზაფხულში იქნება

ავსტრალიაში მეცნიერებმა კორონავირუსის საწინააღმდეგო ორი ვაქცინის გამოცდა დაიწყეს. ვაქცინები ოქსფორდის უნივერსიტეტისა და ამერიკული კომპანიის, Inovio Pharmaceutical-ის მეცნიერებმა შექმნეს. ჯანდაცვის მსოფლიო ორგანიზაციამ კი დართო მათ ნება ტესტირება ცხოველებზე დაიწყონ.

როგორც BBC წერს, ავტრალიის მეცნიერებათა ეროვნულ სააგენტოში გამოცდიან, რამდენად ეფექტურია ეს ვაქცინები და უსაფრთხოა თუ არა ადამიანებისთვის.

მკვლევრები ამბობენ, რომ ვაქცინაზე მუშაობა უპრეცედენტოდ სწრაფად მიმდინარეობს.

გასულ დღეებში CSIRO-ს (ავსტრალიის თანამეგობრობის სამეცნიერო და ინდუსტრიული კვლევითი ორგანიზაცია) გუნდმა ვაქცინის გამოცდა პატარა, ბეწვიან ძუძუმწოვრებზე დაიწყო, რომლებშიც კორონავირუსი ისევე ვრცელდება, როგორც ადამიანებში.

მთელ მსოფლიოში სხვადასხვა ფარმაკოლოგიური კომპანიები დამოუკიდებლად მუშაობენ ვაქცინის შესაქმნელად და როგორც BBC წერს, ამ ეტაპზე, სულ მცირე, 20 ვაქცინაზე მუშაობენ. CSIRO-მ კი აირჩია იმ ორი ვაქცინის ტესტირება, რომელიც შეარჩია საერთაშორისო კონსორციუმმა.

• როდის ეცოდინებათ მეცნიერებს, მოქმედებს თუ არა ვაქცინა და უსაფრთხოა თუ არა ადამიანებისთვის?

მეცნიერები ამბობენ, რომ ცხოველებზე ტესტირების პირველი შედეგი ივნისის დასაწყისში უნდა იყოს. წარმატების შეთხვევაში, ვაქცინები გადავა კლინიკურ კვლევებში, რომლებიც შეიძლება ჩატარდეს ნებისმიერ ლაბორატორიაში.

მეცნიერები ვარაუდობენ, რომ თუ ყველაფერი წარმატებით ჩაივლის, შესაძლოა, ვაქცინის გამოჩენა მედიკამენტების ბაზარზე დაჩქარდეს, მაგრამ ამავდროულად, არიან ექსპერტები, რომლებიც ჯერ კიდევ სკეპტიკურად არიან განწყობილნი და ამბობენ, რომ ამისთვის მინიმუმ 18 თვეა საჭირო.

კორონავირუსის ახალი შტამი COVID-19 ამ ეტაპზე მსოფლიოს 203 ქვეყანაშია გამოვლენილი. ბოლო მონაცემებით, გლობალური მასშტაბით, 936 436 ადამიანი დაინფიცირდა, მათ შორის 47 250 გარდაიცვალა, ხოლო 194 585 პაციენტი გამოჯანმრთელდა.