იტალიელმა მღვდელმა მრევლის ფოტოები დაბეჭდა, ცარიელ ტაძარში განალაგა და მესა ასე ჩაატარა - "მარტო მსახურება დამთრგუნველი იყო"

კორონავირუსის საფრთხის გამო, მსოფლიოს სხვადასხვა ქვეყანაში ტაძრებში ადამიანები აღარ დადიან და ღვთისმსახურებას სასულიერო პირები მრევლის გარეშე აღავლენენ.

მაგალითად, ასე ხდება იტალიაში, სადაც მღვდლები ცარიელ ტაძრებში ატარებენ მესას. რომის პაპის მიერ ჩატარებული მსახურება კი პირდაპირ ეთერში გადაიცემა.

პადრეებისთვის არ არის მარტივი ცარიელ ტაძარში ლოცვა, ამიტომაც ერთ-ერთმა იტალიელმა მღვდელმა უჩვეულო გამოსავალი იპოვნა. მან თავისი მრევლის ფოტოები მრევლისთვის განკუთვნილ ადგილას განალაგა და მსახურება ისე ჩაატარა. ამის შესახებ CNN წერს და აღნიშნულის დამადასტურებელ ფოტოსაც აქვეყნებს.

პადრე დონ ჯუზეპე კორბარი ლომბარდიის რეგიონიდანაა. როგორც მან CNN-ს უთხრა,მრევლის ფოტოების განლაგების იდეა გაუჩნდა, რადგანაც 24 თებერვლიდან მათ გარეშე ტარდებოდა მესა, რაც ძალიან რთული და დამთრგუნველი იყო.

კორბარის თქმით, როდესაც მრევლს სთხოვა, რომ ფოტოები გამოეგზავნათ, არ ელოდა მათგან ამგვარ ჩართულობას და ასეთ პასუხს.

"არ მოველოდი ასეთ თანამშრომლობას. მათ გამომიგზავნეს ფოტოები და შემდეგ დავბეჭდე. ახლა ვხედავ, რომ სხვა სამრევლოებიც აკეთებენ იგივეს“, - ამბობს მღვდელი.