ავტორი:

საჩუქარი მკითხველს - ქართული ბესტსელერები ჟურნალ "გზასთან" ერთად სპეციალურ ფასად გაიყიდება

საჩუქარი მკითხველს - ქართული ბესტსელერები ჟურნალ "გზასთან" ერთად სპეციალურ ფასად გაიყიდება

30 აპრილიდან მკითხველი ჟურნალ "გზასთან" ერთად სპეციალურ ფასად მიიღებს პროექტში "გახდი ბესტსელერის ავტორი" გამარჯვებულების წიგნებს, ქართულ ბესტსელერებს, რომლებმაც პოპულარობით ყველა რეკორდი მოხსნეს.

მაშინ როცა, საგანგებო მდგომარეობის დროს, წიგნის მაღაზიები დაიკეტა და მკითხველს წიგნთან წვდომა შეეზღუდა, ეს საჩუქარი ბევრს გაახარებს.

მკითხველი შეძლებს იმ წიგნების შეძენას, რომლებიც სამი წელია პოპულარობას არ თმობენ და ინარჩუნებენ წამყვან პოზიციებს ყველაზე გაყიდვად ტოპ-10 წიგნს შორის.

ავტორების ჩამონათვალი კი, ასე გამოიყურება:

  • ელის დოჯსონი ("რაფლეზია")
  • თათული ღვინიანიძე ("აღიარება ხელისგულზე")
  • შორენა ხუხუა ("შემოვალ ეტლით")
  • ნიკოლოზ ტოტოღაშვილი ("შვიდი მომაკვდინებელი გრძნობა")
  • გვანცა გუბელაძე ("შულამელი გოგონები")
  • ნათია ჯაგოდნიშვილი ("ცდუნება")
  • ვახტანგ ვახტანგაძე ("ალაჰი ჩემი მეგობარია")
  • იაგო თვალაბეიშვილი ("ტრანსმუტაცია")
  • თინათინ ბერიძე ("მოპარული სიყვარული")
  • არჩილ ფირიაშვილი ("ფეხბურთის მოთამაშე")
  • ნანი მანველიშვილი ("ოდისევსის სინდრომი")
  • თამარ გოდერიძე ("ყვავილები სახლთან ახლოს")
  • ნიკოლას მაჩაბელი ("ჩაინა კონტრასტებიდან")

სწორედ პროექტ "გახდი ბესტსელერის ავტორის" დამსახურებით დამკვიდრდა ქართული წიგნის ბაზარზე ტენდენცია, რომ წიგნების ტოპ-ათეულში ძირითად პოზიციებს ქართველი ავტორები ინარჩუნებენ, კერძოდ კი სწორედ ამ პროექტის გამარჯვებულები.

უნდა ითქვას, რომ ამ ნიჭიერი ავტორებიდან ბევრი არ აპირებდა ან ვერ ბედავდა წერას, მით უფრო რომანისას, მაგრამ გამომცემლობა "პალიტრა L"-ის დამსახურებით გაიკაფეს გზა ქართულ ლიტერატურაში, გახდნენ ავტორები, რომლებიც სჭირდება ქართულ ლიტერატურასა და მკითხველს. მათი პოპულარული ნაწარმოებების შინაარსი და სათქმელი კი ერთმანეთისგან განსხვავებული და ორიგინალური აღმოჩნდა.

აღსანიშნავია, რომ ამ ავტორთაგან ორი - შორენა ხუხუა და იაგო თვალაბეიშვილი პრემია "ლიტერას" ლაურეატები არიან, ვახტანგ ვახტანგაძე კი "ლიტერას" ფინალისტი გახდა. შორენა ხუხუას "შემოვალ ეტლით" გერმანულ ენაზე ითარგმნა და ის ფრანკფურტის ფესტივალზე ავსტრიელმა რედაქტორმა წარადგინა; ელის დოჯსონის "რაფლეზია" ინდოეთში გაიყიდა; ნიკოლოზ ტოტოღაშვილის "შვიდი მომაკვდინებელი გრძნობა" 2019 წლის ბესტსელერი გახდა ნომინაციაში "ქართველი ავტორი".

"საქართველოში საგანგებო ვითარების გამოცხადების შემდეგ, როდესაც წიგნის ყიდვაც შეუძლებელი გახდა, როდესაც სოციალურ ქსელში გვწერენ და გვეკითხებიან, როგორ შეიძლება გახდეს წიგნი მათთვის ხელმისაწვდომი, ვიფიქრეთ, როგორ შეიძლებოდა მკითხველამდე მიგვეტანა წიგნები, რომლებიც სახლში ყოფნისას, დროის სასიამოვნოდ გატარების და ლიტერატურულ თავგადასავალში მოგზაურობის საშუალებას მისცემდა. რადგან პრესა შეზღუდული არ არის, ჩვენი პროექტები პრესასთან ერთად კვლავ გაგრძელდება" - გვეუბნება "პალიტრა L" მარკეტინგისა და პიარის ხელმძღვანელი ანანო თავხელიძე.

აი, რას წერენ თავიანთი წიგნების შესახებ ავტორები, რომელთაც კონკურსში გამარჯვება მოიპოვეს.

თათული ღვინიანიძე: "აღიარება ხელისგულზე", ეს არის მოდერნისტული რომანი, პოსტმოდერნისტული ელემენტებითა და სიმბოლიზმით. ვიყენებ ზუსტად იმ ენასა და ლექსიკას, რომლითაც ჩვენს საზოგადოებაში მეტყველებენ. როცა მკითხველს მარტივი ენით ესაუბრები, სწრაფად შედის როლში. წიგნში ყოველ გვერდზე რაღაც ახალი ხდება და, ყოველი თავის დასასრული რთული გამოსაცნობია. წიგნი სავსეა სიყვარულითა და ვნებით! თითქოს ფურცლებში ჩაბნეულია მარცვლები და ყველა ასაკის ადამიანს შეუძლია სასურველი მარცვლის გაღვივება".

თინათინ ბერიძე: "ერთ დღეს მე და ჩემს მეგობრებს სოციალურ ქსელში საინტერესო ამბავი "შემოგვეყარა". ეს იყო ის ამბავი, რომელიც უნდა გამეგრძელებინა. გამომცემლობა "პალიტრა L"-ის კონკურსმა ყველაფერი გააკეთა, რომ ჩემი წიგნი დაწერილიყო. მეხმარებოდა იმ ადამიანების თანადგომა და შთაბეჭდილებები, რომლებიც კითხულობდნენ ჩემს ნაწერებს. და კიდევ: ყველა მეუბნება, შენს წიგნზე საუკეთესო კინოსცენარი დაიწერება, თითქოს მოვლენები კინოკადრებივით მიდისო... გამიხარდება, თუ ეს მოხდება".

არჩილ ფირიაშვილი: "ბიზნესის სფეროს წარმომადგენელი ვარ. ვერასოდეს ვიფიქრებდი, თუ ჩემს დაგროვებულ სათქმელს ასე ამოვთქვამდი. ამისთვის გზა ამ შესანიშნავმა კონკურსმა გამიხსნა. ჩემი წიგნი არის იმ პროტესტის გამოხატვა, რომელიც ადამიანებს ცხოვრების მიმართ აქვთ. ეს იმ ადამიანის ამბოხია, რომელიც ვეღარ იტანს სიყალბეს და ახალ ცხოვრებას იწყებს".

თამარ გოდერიძე: "არც ვიცი, როგორ გამოვხატო მადლიერება იმ კონკურსის მიმართ, რომელმაც ჩემი ფიქრები წიგნად აქცია. წიგნში სამი თაობის განცდებია გადმოცემული და ვიცი, რომ სამივე თაობა სიამოვნებით წაიკითხავს. ჯერ კიდევ კონკურსის მიმდინარეობისას უთბილესი განცდებით მავსებდა კონკურსის მკითხველების ნათქვამი - როცა შენს რომანს ვკითხულობდით, ზოგჯერ ვტიროდითო. ეს ბედნიერებაა ჩემთვის და, ალბათ, ასე იქნება მკითხველისთვისაც".

ნიკოლას მაჩაბელი: "ეს არის ამბავი ქართველ ახალგაზრდაზე, ანუ ყველა იმ ახალგაზრდის სიმბოლოზე, რომლებიც უცხოეთში მიდიან საარსებოდ. ჩემი გმირი საკუთარ თავს უსვამს კითხვას, ღირს თუ არა წასვლა. და რადგანაც არ არის სხვა გამოსავალი, მაინც მიდის. თუმცა არა ევროპაში ან ამერიკაში, არამედ ჩინეთში, სადაც ისეთ მძაფრ რეალობას ეჩეხება, რომელიც მკითხველს ბევრ რამეს შეახსენებს სიცოცხლესა და მის საზრისზე. ეს ქართველი ბიჭი ისე განიცდის სამშობლოსგან შორს ყოფნას, რომ როდესაც დედასთან რეკავს, სთხოვს, ჩვენი უბნის ჩიტების ჭიკჭიკი მომასმენინეო. და საბოლოოდ, სამშობლოში ბრუნდება, რითაც საკუთარ თავს უბრუნდება".

შორენა ხუხუა: "ჩემი წიგნი შეზღუდული შესაძლებლობის ადამიანის სულის ნაწილია, რომლის გამოხატვის საშუალება მომცა იმ შესანიშნავმა პროექტმა, როგორიც არის "გახდი ბესტსელერის ავტორი". შეიძლება ეს წიგნი იმიტომ დავწერე, რომ ვიცი, რას ნიშნავს სიარული, სირბილი, შემდეგ კი ეტლში ჯდომა და ისევ ადგომა. ეს მოხდა მაშინ, როდესაც ჩემს ცხოვრებაში ისეთი საბედისწერო შემთხვევა მოხდა, რის შემდეგაც…ექვსი თვის განმავლობაში გაუნძრევლად ვიწექი. ალბათ, ამიტომ გავბედე ასეთ რთულ თემას შევხებოდი. მინდოდა მკითხველს დაენახა "ბორბლებით მოსიარულე" ადამიანი, რომელიც საკუთარი ინდივიდუალურობით ფასობს".

30 აპრილს ჟურნალ "გზასთან" ერთად მკითხველი მიიღებს თათული ღვინიანიძის რომანს "აღიარება ხელისგულზე".

წიგნის სპეციალურ ფასი 8,50 ლარი იქნება ჟურნალ "გზასთან" ერთად 10,00 ლარი.

#მოუსმინეწიგნებს - აუდიოწიგნები ყველა ჟანრისა და ასაკის მიხედვით

მოსასმენი ზღაპრები და მოთხრობები პატარებისთვის - ტოპ 5 აუდიო წიგნი

ელიფ შაფაქის „სიყვარულის 40 წესი“, გაზეთ „კვირის პალიტრასთან“ ერთად, სპეციალურ ფასად გამოვიდა