რას ამბობენ საგარეო საქმეთა სამინისტროში ელჩ ზურაბ აბაშიძის მდგომარეობაზე, რომელსაც კორონავირუსი დაუდგინდა

საქართველოს ელჩს ყაზახეთში, ზურაბ აბაშიძეს კორონავირუსი დაუდგინდა. საქართველოს საგარეო საქმეთა სამინისტრო გავრცელებულ ინფორმაციას "ინტერპრესნიუსთან" საუბარში ადასტურებს.

უწყების ცნობით, ამჟამად აბაშიძე ყაზახეთში მკურნალობს.

"იგი გადის მკურნალობის კურსს ყაზახეთის შესაბამისი სპეციალისტების მეთვალყურეობის ქვეშ, რომელთანაც თავის მხრივ მუდმივ კონტაქტზე იმყოფებიან ქართველი მედიკოსებიც" - აცხადებენ სამინისტროში.

ის, რომ ელჩს კორონავირუსი დაუდგინდა, გუშინ გახდა ცნობილი. AMBEBI.GE ინფორმაციის გადასამოწმებლად ზურაბ აბაშიძის ოჯახის წევრს, მისი მეუღლის თეონა ბენაშვილის დას, თამთა ბენაშვილსაც დაუკავშირდა, თუმცა ის მოკლე პასუხით შემოიფარგლა: "რაც გაავრცელეს, იმაზე მეტს ვერაფერს ვერ გეტყვით".