კაშკაშა "კოცონები“ და გრანულოვანი ფენა - მზის ზედაპირის ფოტოები ყველაზე ახლო ხედით

ევროპის კოსმოსურმა სააგენტომ მზის ზედაპირის ფოტოები გამოაქვეყნა, რომლებიც მზისგან 77 მილიონი კილომეტრის დაშორებიდანაა გადაღებული და როგორც BBC წერს, აქამდე ასე ახლოდან მზის ზედაპირი არასდროს აღუბეჭდავთ. აღსანიშნავია, რომ ფოტოები 2020 წლის დასაწყისშია გადაღებული.

მიუხედავად იმისა, რომ ფოტოები შედარებით ახლოდანაა გადაღებული, ისინი არ გამოირჩევიან მაღალი რეზოლუციით. როგორც მეცნიერები განმარტავენ, სურათებზე ჩანს პატარ პატარა ხანძრები, როგორც თავად უწოდებენ, "კაშკაშა კოცონები", რომელიც მზის ზედაპირზეა მოდებული.

"აქამდე ასეთი ახლო მანძილიდან მზისთვის ფოტოები არ გადაგვიღია და ეს მართლაც შთამბეჭდავია. მათზე ვხედავთ პატარ-პატარა ხანძრებს მზის ზედაპირზე“, - ამბობს ასტრონომი დევიდ ლონგი.

ეს კოცონები მზეზე უფრო კაშკაშაა, თუმცა მეცნიერები დეტალებზე ჯერჯერობით ვერ საუბრობენ. ასტრონომთა მტკიცებით, იმ ზედაპირის მიღმა, რომელსაც ვხედავთ, მზის გრანულოვანი ტიპის ფენა იმალება, რომელიც დაახლოებით ისეთია, როგორიც ქვემოთ მოცემულ ფოტოზეა აღბეჭდილი.

ფოტოები ორბიტული მფრინავი აპარატის მიერაა გადაღებული სპეციალური მისიის ფარგლებში. მისია ნასასა და ევროპის კოსმოსური სააგენტოს თანამშრმლობით ხორციელდება.