ვინ არის "მაქსიმ პლახოი", რომელმაც უკრაინაში მგზავრებით სავსე ავტობუსი გაიტაცა და რა მოთხოვნები აქვს  - ახალი დეტალები

მამაკაცი, რომელმაც ქალაქ ლუცკის ცენტრიდან მგზავრებით სავსე ავტობუსი გაიტაცა, ნასამართლევია, - ამის შესახებ ინფორმაციას უკრაინული მედია ქვეყნის შინაგან საქმეთა მინისტრის მოადგილე ანტონ გერაშჩენკოზე დაყრდნობით ავრცელებს.

ამასთან, უკრაინელი ჟურნალისტი იური ბუტუსოვი აცხადებს, რომ მას ავტობუსის გამტაცებელმა დაურეკა და ჟურნალისტების მისვლა მოითხოვა.

"ის ჟურნალისტებისგან თავისი მოთხოვნების გავრცელებას ითხოვს. მან თქვა, სურს, ყველა ჟურნალისტი მივიდეს მასთან, მე კი ვუპასუხე, რომ მზად ვარ მივიდე, თუკი ის ავტობუსიდან ქალებსა და ბავშვებს გაათავისუფლებს,“- აცხადებს ბუტუსოვი.

მისივე თქმით, გამტაცებელმა უთხრა, რომ შეიარაღებულია.

აღსანიშნავია, რომ უკრაინელი სამართალდამცველების თქმით, ინტერნეტში გავრცელებულია წიგნი "დამნაშავის ფილოსოფია“, რომლის ავტორიც "მაქსიმ პლახოია“, სადაც ის ციხეში ყოფნის პერიოდსა და ცხოვრების შესახებ თავის შეხედულებებს აღწერს. მამაკაცი, რომელმაც ავტობუსი გაიტაცა, თავის თავს სწორედ "მაქსიმ პლახოის" უწოდებს.

ცნობისთვის, უკრაინის ქალაქ ლუცკში შეიარაღებულმა პირმა ავტობუსი გაიტაცა და მგზავრები მძევლად აიყვანა, გატაცებამდე მამაკაცმა ვიდეომიმართვა გაავრცელა, სადაც ყველას ულოცავს "ანტისისტემის“ დღეს და აცხადებს, რომ "სახელმწიფო - პირველი ტერორისტია.“

მამაკაცი მოითხოვს, რომ მაღალჩინოსნებმა ვიდეომიმართვა ჩაწერონ, სადაც იტყვიან, რომ "კანონიერი ტერორისტები“ არიან. კერძოდ, ის აღნიშნული შინაარსის ვიდეომიმართვის გავრცელებას სასამართლოების, სამინისტროების, პროკურატურის, პარლამენტისა და ეკლესიის მეთაურებისგან ითხოვს. გამტაცებელი აცხადებს, რომ ერთი ასაფეთქებელი მოწყობილობა ხალხმრავალ ადგილზე აქვს დამონტაჟებული. არსებული ინფორმაციით, ავტობუსში 20-მდე ადამიანი იმყოფება.