აშშ-ში ოჯახის 14 წევრს კორონავირუსი დაუდასტურდა, მათგან ერთი კი გარდაიცვალა - "ეს უდიდესი ტკივილი და უიმედობაა"

აშშ-ში, ტეხასში, ოჯახის 14 წევრს ახალი კორონავირუსი, COVID-19 დაუდასტურდა. მათგან ერთი კი გარდაიცვალა.

ოჯახის ერთ-ერთი წევრი, 43 წლის ტონი გრინი, რომელიც უკვე გამოჯანმრთელდა, საუბრობს იმის შესახებ, თუ რა გავლენა მოახდინა მის საყვარე ადამიანებზე კორონავირუსის პანდემიამ.

"უდიდესი ტკივილი და უიმედობა გამოვცადეთ, მხოლოდ ლოცვა შეგვეძლო“, - ამბობს გრინი NBC-სთან ინტერვიუში და ყვება, რომ ის და თავისი ცოლი 13 ივნისს მშობლებთან მივიდნენ, სადაც პატარა ოჯახური შეკრება მოაწყვეს. ოჯახური შეკრების დროს პირბადე არავის არ ეკეთა. მომდევნო დღეს კი გრინი ავად გახდა.

რეალურად არავინ იცის ოჯახის რომელი წევრი იყო თავდაპირველად ინფიცირებული.

ტონი გრინი ამბობს, რომ ორი დღის შემდეგ ავად გახდნენ მისი ცოლი, ცოლის მშობლები და ბებია. საერთო ჯამში კი კორონავირუსით ერთი ოჯახის 14 წევრი დაინფიცირდა.

"ჩვენ ვგრძნობდით, რომ ჩვენს ოჯახსაც შეეხო ის საშინელება, რომელიც ქვეყანაშია. არც ერთ ჩვენგანს შეკრებამდე სიმპტომები არ გვქონია, სიცხე მოულოდნელად მოგვცა“, - ამბობს გრინი.

გრინის ცოლის ბებია კორონავირუსით 2 ივლისს საავადმყოფოში გარდაიცვალა. უცნობია, თუ რა ასაკის არიან ინფიცირებულები, ასევე აქვთ თუ არა რაიმე თანმდევი დაავადება. მათი ნაწილი გამოჯანმრთელდა, ნაწილი კი მკურნალობას განაგრძობს.

აშშ კორონავირუსით ინფიცირებულთა რაოდენობის თვალსაზრისით, მსოფლიოს პირველი ქვეყანაა და საერთო ჯამში იქ COVID-19-ის 4.4 მილიონი შემთხვევაა აღწერილი, გარდაცვლილია 150 500 ადამიანი, ხოლო გამოჯანმრთელებულია 2.1 მილიონი პაციენტი.