"მეუბნებიან, რომ პუტკუნა ბავშვებს, ვისაც ტკბილეული უყვარს, ელვირს ეძახიან..." - როგორ მოირგო ნიკა ქავთარაძემ ჩცდ-ს ყველაზე სკანდალური როლი?

პოპულარული სერიალის "ჩემი ცოლის დაქალების" მე-16 სეზონი დაიხურა. როგორც ყოველ სეზონზე, პროექტში წელსაც ბევრი ახალი პერსონაჟი გამოჩნდა, მათ შორის, "ტროლების უფროსი" ელვირი. ამ როლის შესრულება გადამღებმა ჯგუფმა ნიკა ქავთარაძეს მიანდო. ნიკას კარიერის განმავლობაში თავი არაერთ ამპლუაში მოუსინჯავს, თუმცა სერიალში როლი პირველად ითამაშა და არცთუ ურიგოდ.

როგორ აფასებს ნიკა ქავთარაძე სერიალში თავის ნამუშევარს, როგორ მოირგო უარყოფითი როლი, მიიღო თუ არა მისი შექმნილი ელვირი მაყურებელმა და რას ურჩევდა პერსონაჟს, ამაზე ambebi.ge-სთან თავად საუბრობს.

"ჩემი სერიალში შესვლა ნამდვილად რისკი იყო, მაგრამ ეს ასე პირდაპირ არ მომხდარა, სინჯები გადამიღეს, იმსჯელეს და როლზე ამის შედეგად დამამტკიცეს... ყოველი გადაღების დღეს ძალიან ვნერვიულობ, რადგანაც რისკი, რომ მაყურებელი ჩემს დანახვაზე სხვა მიმართულებით არ წავიდეს, სულ არსებობს, მით უმეტეს, რომ გარეგნული თვალსაზრისითაც არაფერი შემიცვლია... მაგრამ არის თაობა, რომელმაც თქვენგან განსხვავებით, ახლა გამიცნო, საერთოდ არ იციან, ვინ ვარ, არც ახსოვთ, აქამდე რას ვაკეთებდი, რადგანაც მაშინ პატარები იყვნენ...

ამიტომ, ვიღაცებისთვის მე ვარ მხოლოდ ელვირი. ამას მერე მივხვდი, როცა ჩემი მონაწილეობით პირველი სერია გავიდა", - გვეუბნება ნიკა ქავთარაძე, რომელსაც სასცენო მუშაობის გამოცდილება ნამდვილად აქვს, მაგრამ პროფესიით მსახიობი არ არის, თუმცა ამას როლის შექმნაში, ვფიქრობ, ხელი არ შეუშლია... ასევე რისკი ისიც იყო, რომ არამსახიობს ასეთი უარყოფითი პერსონაჟის როლი უნდა ეთამაშა...

"მთელი ჯგუფი ზრუნავს იმაზე, რომ ტიპაჟი შედგეს, მეც ვზრუნავ... ამიტომ, როდესაც გამოცდილი ადამიანები, დარწმუნებულები იყვნენ გადაწყვეტილებაში, სახე აირჩიეს, - ეს მამშვიდებდა, თორემ მსახიობი რომ არ ვარ, ფაქტია! თანაც ისეთი ხაზით შევედი სერიალში, რომელიც ჩვენს ცხოვრებაშიც ერთ-ერთი მთავარი პრობლემაა, ანუ ტროლებს და ბოტებს ვგულისხმობ", - აღნიშნავს ნიკა ქავთარაძე.

- როდესაც პერსონაჟის ხასიათს მიხვდი, რამდენად კომფორტული იყო ამ პერონაჟთან შენი მიახლება?

- ტიპს იმდენი უარყოფითი თვისება აქვს, დადებითი საერთოდ, არაფერი გააჩნია. თავის ქცევებით, მანერებით იმდენად გროტესკული ტიპაჟია, რომ მსგავსი, კონკრეტული პერსონა არც არსებობს ალბათ, რომელსაც მიბაძავ და როლს ასე შექმნი. ასე რომ, არავის მანერების "დამუღამება" არ დამჭირდა. სრულიად ახალი გმირის შექმნა მომიხდა, (არა)ჩვეულებრივის.

აქ კი უკვე ჩემი წარმოსახვის ტიპი მყავდა, რომელიც არის უპრინციპო, ყველაფერზე წამსვლელი, მასში ბევრი ვიღაცის ცუდი თვისებაა თავმოყრილი. ერთი შეხედვით რთული როლია, მაგრამ მაინც ადვილი, იმიტომ, რომ არ თამაშობ ყველასთვის ნაცნობ ტიპს. ტროლების დირექტორი ხომ არავინ იცის როგორია?! ეს ხომ არ არის რომელიმე ცნობილი, რეალური პერსონა, ირიალურია.

- ასე რომ, საქართველოში პირველი ხარ, ვინც ტროლების ფაბრიკის, თუ ქარხნის დირექტორის როლი ითამაშა...

- მაგის გამო ქეთი დევდარიანის და ირაკლი საღინაძის მადლიერი ვარ. საერთოდ, კი იმისი, ვინც ეს იდეა მოიფიქრა, რომ ასეთი პერსონის გასაჯაროება მომხდარიყო. მართალია, არ ვიცით, ისინი ვინ არიან, მაგრამ ჩვენს ცხოვრებაში არსებობდნენ ადამიანები, ვისაც წარმოდგენაც არ ჰქონდათ ასეთი ტროლებსა თუ ბოტებზე. დღეს კი შეიძლება 80 წლის ქალმა თუ კაცმა მათ შესახებ უკვე იცოდეს.

- დამაჯერებელია შენ მიერ შესრულებული როლი, ამას ბევრი აღნიშნავს. როგორ შეძელი?

- ადრეც მითქვამს, ქეთი დევდარიანმა მითხრა, - იცოდე, ისე მოხდება, ქუჩაში ნიკას ნაცვლად ყველა ელვირს დაგიძახებსო, რაც გამართლდა... ხოლო თუ ჩემი როლი შედგა, ეს უკვე მხოლოდ ჩემი დამსახურება არ არის, იმ ადამიანების დამსახურებაა, ვინც გადაღების მიმართ ვალდებულებას და პასუხისმგებლობას იღებს. ამას გადამღებ ჯგუფში ყველა გრძნობს და თავის საქმეს კარგად აკეთებს და საბოლოოდ გამოდის ნამუშევარი კარგი, მეტიც, იდეალური.

გადაღებისას ჩემი, პიროვნული უკან მაქვს გადადებული და სრულიად მინდობილი ვარ რეჟისორს, ადამიანს, ვისაც ეს პროცესი მიჰყავს. ასეთი კარგი რეჟისორები, როგორიც ამ სერიალს ჰყავს, იშვიათია. საშუალებას არ გაძლევენ, რომ ზედმეტად ინერვიულო. შეიძლება, 2-3 სერია ტიპის ძიებაში ხარ, მაგრამ მერე შენს ნამუშევარს ნახულობ და ცდილობ, ხასიათი მეტად დაიჭირო და უფრო კონკრეტული ტიპი შექმნა - ეს პროცესის ნაწილია.

- შენი პერსონაჟის შესახებ ცუდი კომენტარები წამიკითხავს...

- ელვირი რატომ უნდა უყვარდეთ? ისეთი ცუდი და ბოროტი ტიპია, სიყვარულს არ უნდა იმსახურებდეს. უბრალოდ, ვიღაცებს მაინც უყვართ... მაგრამ ჩემზე არ შემხვედრია კომენტარი, როლს ცუდად აკეთებსო. თორემ, ვიმეორებ, ელვირი მოსაწონი რომ არ არის, ამას რა თქმა უნდა?! ის კი არა, ინტერნეტში სალომე შარვაძის გმირს, ქეთის "პუტავდნენ", ბულინგი მოუწყვეს, განიხილავდნენ - ქმარს უღალატაო...

საერთოდ, ეს ადამიანები ამ სერიალს ასე აღიქვამენ, ნაწილს ეს პერსონაჟები კონკრეტული ტიპები ჰგონია. უნდთ, მათ ჭკუაზე იარონ. ვიმეორებ, უცნაური ისაა, რომ ასეთი დონის უარყოფითი გმირი ვიღაცებისთვის საყვარელი პერსონაჟია. ეს კი რეჟისორების დამსახურებაა.

- ისე, როგორი ტიპია? რა უნდა?

- ფული უნდა, ძალაუფლება და არაფერი სხვა. ყელაფერზე წამსვლელი ადამიანია, უპრინციპო, გარკვეულწილად უსქესოც, მიუხედავად იმისა, რომ ეს ხაზი უცნაურად ჩანს სერიალში. არავინ უყვარს, დარწმუნებული ვარ, დედაც არ უყვარს. უბრალოდ, დედა ჰყავს, რომელიც უვლის და აქედან გამომდინარე, მასთან რაღაც ტიპის ურთიერთობა უნდა ჰქონდეს. სახლში კომფორტი სჭირდება.

- ცხოვრებაში შეხვედრიხარ ასეთ ადამიანს?

- ეგენი ძალიან ცუდი ადამიანები არიან, საერთო კეთილდღეობას აფუჭებენ, არარსებულ რეალობას ქმნიან და იმ რეალობას ხალხს აჯერებენ. მერე ნებისმიერი, რომელიც იტყვის, რომ ეს ასე არ არის, მას ატყუებენ... ეს ტიპი სიახლე სერიალისთვის, ამ ფორმატისთვისაა, თუმცა კე-გე-ბე-ს ჰყავდა ასეთი ხალხი იმისთვის, რომ ვიღაცაზე რაღაც ჭორი აეგორებინათ და ადამიანი გაეშავებინათ, რათა საზოგადოებას მასზე სხვა წარმოდგენა შეჰქმნოდა. ახლა ასეთი ადამიანებისთვის სამოქმედო "იარაღი" ინტერნეტია. ცუდია, რომ ტროლებით და ბოტებით ხელისუფლება ხალხს ებრძვის. საოცება ხდება - ინტერნეტში ადამიანებს იმას აჯერებენ, ბუნებაში რაც არ არსებობს.

- რას ურჩევდი ელვირს?

- დარწმუნებული ვარ, ელვირს არაფერი ეშველება. თან, მე რა უნდა ვურჩიო?! გმირია და ეგ არის, ვერაფერს ვურჩევ. თუ სერიალში დიდხანს იქნება, "გამისწორდება".

- მე-16 სეზონს სევდიანი ფინალი ჰქონდა, ახალი ამბებიც დაიხლართა. როგორ გგონია, რა პერსპექტივა აქვს შენს გმირს?

- არა მგონია, შემოდგომაზე სხვანაირი ქვეყანა გვქონდეს, სადაც ტროლების თემა აქტუალური არ იქნება, გააგრძელებს ალბათ ელვირიც "სიცოცხლეს"... საინტერესოა, ბაქართან, ბიზნესის მიმართულებით ხაზის განვითარება. რეალურად არ მაქვს ინფორმაცია და ჩემ ვარაუდებს, რა, როგორ იქნება, ვერ გამოვთქვამ...

- ბოლოს სოციალურ ქსელში ნინას პერსონაჟი გახდა განკითხვის ობიექტი.

- არადა, უცნაურია, - წიგნს რომ კითხულობ, მერე მეგობრებთან ერთად გმირებს ლანძღავ? ეს გმირი ხომ ავტორის მოფიქრებულია და რაღაც კონტექსტშია ჩაბმული. ნინა სადღაც რომ წავიდა, ეს ხომ სცენარია? არადა, ვიღაცას, ვინც კომენტარებს წერს, რეალობა ჰგონია...

რეალურსა და მხატვრულს შორის განსხვავება უნდა ვიპოვოთ. ჩვენ არ ვცხოვრობთ მხატვრულ სამყაროში, მაგრამ რატომღაც იდეალურ სამყაროს "ჩცდ"-ში ვეძებთ. ამ სერიალის მთავარი ღირსება ის არის, რომ ცოცხალია, ისევე როგორც ბევრი რამ ჩვენს ცხოვრებაში. ეს ხომ არ არის დოკუმენტური ფილმი?! მოკლედ, უყურონ სერიალს და მერე თავის ცხოვრებაზე იფიქრონ. ჩვენ გვინდა, ცხოვრება გავუმარტივოთ და ნუ გაირთულებენ ცხოვრებას.

- "ჩცდ"-ს არანაკლები უარყოფითი პერსონაჟია ცოტნე, ჩვეულებრივი მედროვეა, მთელი სერიალის განმავლობაში რა მანტია არ მოირგო - მასთან ელვირს ახლო კონტაქტი აქვს...

- ცოტნეს სიმშვიდე, ფული და გართობა უნდა, - საკუთარი კომფორტის კაცია, ჩვეულებრივი ეგოისტი, მაგრამ ელვირისგან განსხვავებით, რაღაც ტიპის მორალი მაინც აქვს და აწუხებს. ელვირი მთლად უნამუსოა!

- რას ეტყოდი შენს მაყურებელს, რომელიც მთელი სეზონი აქტიურად გიყურებდა?

- ნებისმიერ შემთხვევაში, რანაირი სერიალიც არ უნდა იყოს, მაყურებელმა მისი ყურებით სიამოვნება უნდა მიიღოს ისე, როგორც მხატვრული ნაწარმოებით. თუმცა შეიძლება გარკვეული ასოციაციები ჰქონდეთ და ამაზე ილაპარაკონ კიდეც. საერთოდ, კი მადლობა, რომ უყურებენ და ჩემს გმირს გულშემატკივრობენ. ქუჩაში ხალხი თბილად მხვდება და იმასაც მეუბნებიან, რომ პუტკუნა ბავშვებს, ვისაც ბევრი ტკბილეული უყვარს, ელვირს ეძახიან...