"სიკვდილის გველეშაპი შემოეხვია ქვეყანას და ეს გველეშაპი გზებზეა გაწოლილი" - მწერალი გურამ მეგრელიშვილი შატილის ტრაგედიას ეხმაურება
მწერალი გურამ მეგრელიშვილი შატილში მომხდარ ტრაგედიას ეხმაურება, რომელსაც 17 ადამიანი ემსხვერპლა. ის "ფეისბუქის" პირად გვერდზე წერს:
"სიკვდილის გველეშაპი შემოეხვია ქვეყანას. დღენიადაგ ითხოვს ახალგაზრდების სისხლს და ჩვენც, გადარჩენისთვის, ალალბედზე და შემთხვევითობით, ვუგზავნით ბიჭებს და გოგოებს.
გაუბრალოვდა სიკვდილი, გაუბრალოვდა გლოვაც. მახსოვს, ახალგაზრდის გარდაცვალებას რომ გაიგებდნენ, საიდან არ მიდიოდა ხალხი მისასამძიმრებლად, ბებიაჩემი ტელევიზორს არ ჩართავდა ხოლმე, ხმამ არ შეაწუხოს ვინმე, სამხიარულო არაფერი აჩვენონო.
ამ შეგუებამ, ამ უგლოველობამ და გულცივობამ სხვისი ჭირის მიმართ, ის მოიტანა, რომ აღარც სხვისი გვტკივა და აღარც საკუთარის გვეშინია, გვგონია, რომ გველეშაპი მხოლოდ სხვის შვილებს და ნათესავებს მოითხოვს. არ ვფრთხილობთ და არ ვუფრთხილდებით.
მომწონს ამერიკელების ტრადიცია, გლოვის დღეს მთელი ქალაქი რომ იკრიბება ფოტოებთან, ანთებენ სანთლებს, უსამძიმრებენ ერთმანეთს და გლოვობენ და ლოცულობენ. ღმერთს იქაური სიკვდილის გველეშაპის მოცილებას სთხოვენ ხოლმე და კიდევ უფრო ფრთხილობენ, საკუთარზეც და სხვისაზეც.
სიკვდილის გველეშაპი შემოეხვია ქვეყანას და ეს გველეშაპი გზებზეა გაწოლილი".
- საქართველოში ავტოკატასტროფების შედეგად ყოველწლიურად ასობით ადამიანი იღუპება, ათასობით კი სხეულის მძიმე/მსუბუქ დაზიანებებს იღებს. უკანასკნელი შემთხვევა შატილის გზაზე მოხდა, სადაც ტურისტებით სავსე მიკროავტობუსი ხევში გადავარდა. ადგილზე დაიღუპა 17 ადამიანი, 3 კი მძიმე მდგომარეობაში თბილისის საუნივესიტეტო კლინიკაში გადმოიყვანეს. ავარიებში გარდაცვლილთა საერთო რაოდენობა კი საკმაოდ შემაშფოთებელია. 2020 წლის მხოლოდ 2 კვარტალში (იანვარ-ივნისი) საქართველოს გზებზე 2 270 ავტოსაგზაო შემთხვევისას 203 ადამიანი დაიღუპა, 2 982 კი დაშავდა.
"პირი გამოირეცხეთ ყველამ, ვიდრე ჩვენზე რამეს იტყვით! ძალიან არ მინდოდა წლობით შვილის დატოვება, მაგრამ..." - რას წერს ქართველი ბარონესა ემიგრანტ ქალებზე?
როგორ ცხოვრობს თაკო გაჩეჩილაძე და როგორ ზრდის ორ შვილს - ქართველი მომღერლისა და ბულგარელი მუსიკოსის ოჯახური ფოტოები
