"გიას უთქვამს ბიჭებისთვის, მიშველეთ, დამჭრაო" - ორხევში მომხდარ დანაშაულში ბრალდებულს სამართალდამცავები ჯერ კიდევ ეძებენ

26 აგვისტოს, თბილისში, ორხევის დასახლებაში, მუხაძის ქუჩაძე 39 წლის მამაკაცი მძიმედ დაჭრეს. გია ბითარაშვილი თბილისის მე-5 რეფერალურ საავადმყოფოში გადაიყვანეს, მას ოპერაცია ჩაუტარდა და ამჟამად რეანიმაციულ განყოფილებაშია მოთავსებული. დაჭრილის მდგომარეობა სტაბილურად მძიმეა.

რაც ეხება დამნაშავეს, წარსულში არა ერთგზის ნასამართლევ 35 წლის ნუკრი შავლუხაშვილს, რომელმაც ბითარაშვილი მუცელში დანით დაჭრა, ჯერჯერობით არ არის დაკავებული და იძებნება.შსს-მ ფაქტზე სს საქმე 108-ე მუხლით (განზრახ მკვლელობის მცდელობა) აღძრა.

ambebi.ge დაჭრილის მეუღლეს, ნაზი ბითარაშვილს ესაუბრა.

“დაახლოებით საღამოს 10-ის ნახევარი იქნებოდა, მაღაზიაში ვმუშაობდი, როცა ეს ამბავი გამაგებინეს. როგორც მითხრეს, კორპუსის წინ, ჩემი მეუღლე ეზოში სამ მეგობართან ერთად იჯდა. ნუკრი უზომოდ ნასვამი ყოფილა, იქ გაუვლია და გინება დაუწყია, რაზეც ჩემს მეუღლეს შენიშვნა მიუცია. ამაზე გაღიზიანებულა და ახლა პირადად გიას შეურაცხყოფა-გინებაზე გადასულა, დანას იქნევდა თურმე და ისე სწრაფად გამოუსვია მუცელში, დანარჩენებს ვერც დაუნახავთ. გიას უთქვამს ბიჭებისთვის, მიშველეთ, დამჭრაო, როცა ახლოს მისულან, ჩემს ქმარს ხელში გადმოყრილი ნაწლავები ეჭირა, მას კუჭიც დაზიანებული აქვს. სასწრაფო გამოუძახებიათ და მოსკოვის პროსპექტზე, მე-5 რეფერალურ საავადმყოფოში გადაიყვანეს. ოპერაცია კი ჩაუტარდა, მაგრამ ექიმები წინასწარ ვერაფერს მეუბნებიან, არ ვიცი, როგორ იქნება. როგორც ვიცი, ის რეციდივისტი ჯერ არ დაუჭერიათ, ეძებენ. პირადად არ ვიცნობ, ვინაა, მაგრამ გამიგია, რომ რამდენჯერმე იყო ნასამართლევი ქურდობა-ყაჩაღობისთვის და სხვა დანაშაულებისთვის”.

ავტორი: ანა გიორგაძე