რაში დაარწმუნა პუტინმა ფაშინიანი და როგორია ვითარება მთიან ყარაბაღში - კონფლიქტის მე-11 დღე

მთიან ყარაბაღში შეიარაღებული შეტაკებები კვლავ გრძელდება.საომარი მოქმედებები მთელი ღამის განმავლობაში მიმდინარეობდა.

• რას ამბობენ სომხეთის თავდაცვის სამინისტროში?

სომხეთის თავდაცვის სამინისტროს ოფიციალური წარმომადგენლის, არცრუნ ჰოვანიციანის განცხადებით, აზერბაიჯანელი სამხედროები ქალაქ სტეპანაკერტსა და მთიანი ყარაბაღის სხვა სამოქალაქო დასახლებებზე თავდასხმას განაგრძობენ.

სომხური მედიის ცნობით, არაღიარებული მთიანი ყარაბაღის პრეზიდენტის პრესსპიკერმა, ვაჰრან პოღოსიანმა გაავრცელა ინფორმაცია მთიანი ყარაბაღის "თავდაცვის არმიის მიერ მტრის ტერორისტული არმიის ულმობლად განადგურების“ შესახებ.

• რას აცხადებენ აზერბაიჯანის თავდაცვის სამინისტროში?

აზერბაიჯანის თავდაცვის სამინისტროშიც აცხადებენ, რომ ფრონტის ხაზზე ბრძოლა მთელი ღამის განმავლობაში გრძელდებოდა. მათივე ცნობით, აზერბაიჯანულმა ძალებმა საბრძოლო ოპერაციები სხვადასხვა მიმართულებით განახორციელეს.

"გუშინ მტრის წინააღმდეგ გახსნილი საარტილერიო ცეცხლის შედეგად მე -5 პოლკის თავდაცვის რაიონის სადამკვირვებლო პუნქტი განადგურდა. დაღუპულებისა და დაშავებულების რაოდენობა ბევრია,“- აცხადებენ აზერბაიჯანის თავდაცვის უწყებაში.

მათივე ინფორმაციით, აზერბაიჯანულმა ძალებმა სომხეთის ერთი ტანკი და სამი ქვემეხი გაანადგურეს.

• ბაქო-თბილისი-ჯეიჰანის ნავთობსადენის დაბომბვის მცდელობა

აზერბაიჯანის პროკურატურამ გვიან ღამით გაავრცელა ინფორმაცია სომხეთის შეიარაღებული ძალების მიერ ბაქო-თბილისი-ჯეიჰანის ნავთობსადენის დაბომბვის მცდელობის შესახებ. უწყების პრესსამსახურში განაცხადეს, რომ სარაკეტო დარტყმები დაახლოებით 21:00 საათზე განხორციელდა ნავთობსადენის იმ ტერიტორიაზე, რომელიც ევლახის რაიონში გადის.

"ნავთობსადენი იკავებს განსაკუთრებულ ადგილს ევროპის ენერგეტიკული უსაფრთხოების საკითხში, წარმოადგენს რეგიონის ყველაზე დიდ სტრატეგიულ პროექტს. ჩვენი არმიის გადამწყვეტი ზომების შედეგად, ტერორის ეს მცდელობა აღიკვეთა“, - ნათქვამია უწყების განცხადებაში.

სომხეთის თავდაცვის სამინისტრო უარყოფს აზერბაიჯანის მიერ გავრცელებულ ინფორმაციას. შესაბამისი კომენტარი "ფეისბუქის“ გვერდზე უწყების ოფიციალურმა წარმომადგენელმა არცრულ ოვანისიანმა გააკეთა.

"აზერბაიჯანის განცხადება, რომ სომხეთის სამხედრო ქვედანაყოფები ცდილობდნენ ბაქო-თბილისი-ჯეიჰანის ნავთობსადენზე დარტყმის განხორციელებას, უტიფარი ტყუილია. ჩვენ არაერთხელ გაგვიცხადებია, რომ ნავთობისა და გაზის ინფრასტრუქტურა არ წარმოადგენს ჩვენ სამიზნეს“, - წერს ოვანისიანი.

• რუსეთის როლი

მთიან ყარაბაღში შექმნილი ვითარების შესახებ ნიკოლ ფაშინიანმა BBC-სთან ინტერვიუში ისაუბრა. ფაშიანინი ამბობს, რომ აზერბაიჯანს არ სურს, სომხები ყარაბაღში ცხოვრობდნენ.

"აზერბაიჯანს არ სურს, რომ სომხები მთიან ყარაბაღში ცხოვრობდნენ და ამიტომ, ის ტერორისტების დახმარებით თავს დაესხა ყარაბაღს. რას გვთავაზობენ? მთიანი ყარაბაღის სომხებმა უნდა თქვან, "კარგი, რადგან ტერორისტები ხართ, უარს ვიტყვით ჩვენს ფესვებზე,“- ეს არასდროს მოხდება,“- განაცხადა სომხეთის პრემიერ-მინისტრმა BBC-სთან ინტერვიუში.

კითხვაზე, ლადიმერ პუტინთან საუბრის დროს, დაადასტურა თუ არა რუსეთის პრეზიდენტმა, რომ იმ შემთხვევაში, თუ სომხეთის ტერიტორიებს დაარტყამენ, სომხეთი რუსეთის სამხედრო მხარდაჭერას მიიღებს, ნიკოლ ფაშინიანმა უპასუხა:

"ამ კითხვაზე პოლიტიკური თვალსაზრისით ვერ გიპასუხებთ, თუმცა გეტყვით: რუსეთმა დაგვარწმუნა, რომ ამ შემთხვევაში ის შეასრულებს ხელშეკრულებებით ნაკისრ ვალდებულებებს,“- აღნიშნა ნიკოლ ფაშინიანმა.