აზერბაიჯანი სომხეთს განჯის დაბომბვაში ადანაშაულებს - რა ხდება ყარაბაღში მას შემდეგ, რაც დაპირისპირებული მხარეები ცეცხლის შეწყვეტაზე შეთანხმდნენ

აზერბაიჯანი სომხეთს ცეცხლის შეწყვეტის შეთანხმების დარღვევასა და ქალაქ განჯის დაბომბვაში ადანაშაულებს.

აზერბაიჯანის გენერალური პროკურორის ინფორმაციით, სომხური მხარის ავიაიერიშების შედეგად, 5 ადამიანი დაიღუპა, 28 კი დაშავდა.

ერევანში განჯის დაბომბვის ფაქტს უარყოფენ და ბაქოს საპასუხო ბრალდებას უყენებენ.

მათი მტკიცებით, ცეცხლის შეწყვეტის შეთანხმების მიუხედავად, აზერბაიჯანმა ყარაბაღის ადმინისტრაციული ცენტრი, სტეპანაკერტი დაბომბა.

ცნობისთვის, 9 ოქტომბერს მოსკოვში რუსეთის, აზერბაიჯანისა და სომხეთის საგარეო საქმეთა მინისტრებს შორის შეხვედრა გაიმართა. ისინი შეთანხმდნენ, რომ მთიანი ყარაბაღის კონფლიქტის ზონაში ცეცხლის შეწყვეტის შეთანხმება ძალაში 10 ოქტომბრის 12:00 საათიდან შევიდოდა.