"ყველას ვაკოცებ, ბიჭებსაც და ლამაზ ქალბატონებსაც, ყველას დიდ და მსუყე კოცნას გაჩუქებთ" - ტრამპის მიმართვა ამომრჩეველს

აშშ-ის პრეზიდენტი დონალდ ტრამპი წინასაარჩევნო კამპანიას აქტიურად დაუბრუნდა. კორონავირუსით ინფიცირების შემდეგ მან ამომრჩეველთან სანფორდში, ფლორიდას შტატში, შეხვედრა გამართა.

როგორც BBC წერს, დონალდ ტრამპთან შესახვედრად ათასობით ადამიანი შეიკრიბა. ტრამპმა საზოგადოებას მიმართა და განაცხადა, რომ ის თავს "ძლიერად გრძნობს" და როგორც ექიმებმა უთხრეს, იმუნურია.

"მათ მითხრეს, რომ იმუნური ვარ, თავს ძლიერად ვგრძნობ. ყველას ვაკოცებ, ბიჭებსაც და ლამაზ ქალბატონებსაც, ყველას დიდ და მსუყე კოცნას გაჩუქებთ,“ - მიმართა შეკრებილებს დონალდ ტრამპმა.

ცნობისთვის, ორიოდე კვირის წინ დონალდ ტრამპს კორონავირუსი დაუდასტურდა. ის კლინიკაში გადაიყვანეს, თუმცა სამკურნალო დაწესებულება ორ დღეში დატოვა და თეთრ სახლს დაუბრუნდა. ინფორმაცია იმის შესახებ, რომ ტრამპი ინფიცირებული აღარ არის, ოფიციალურად ჯერ არავის გაუვრცელებია, თუმცა პრეზიდენტის მკურნალი ექიმის განცხადებით, ის "გადამდები აღარ არის, ამიტომაც, შეუძლია აქტიურ ცხოვრებას დაუბრუნდეს."

რაც შეეხება აშშ-ის მოახლოებულ საპრეზიდენტო არჩევნებს, როგორც BBC-ი წერს, Real Clear Politics-ის მიერ ჩატარებული გამოკითხვის თანახმად, პრეზიდენტობის "დემოკრატი“ კანდიდატი ჯო ბაიდენი დონალდ ტრამპს, მთელი ქვეყნის მასშტაბით, თითქმის 10 პროცენტით უსწრებს, თუმცა ეს სხვაობა ზოგიერთ მნიშვნელოვან შტატში ნაკლებია. მაგალითად ფლორიდაში, რომელსაც საპრეზიდენტო არჩევნებში გამარჯვების მოსაპოვებლად, გადამწყვეტი მნიშვნელობა აქვს, ბაიდენს 3.7 პროცენტით მეტი პოტენციური ამომრჩეველი უჭერს მხარს, ვიდრე დონალდ ტრამპს.

აშშ-ში საპრეზიდენტო არჩევნების გამართვა 3 ნოემბერსაა დაგეგმილი.