ოქსფორდის უნივერსიტეტის ვაქცინამ 70%-იანი ეფექტურობა აჩვენა - რას წერს BBC

ოქსფორდის უნივერსიტეტის მიერ შექმნილი კოვიდ 19-ის საწინააღმდეგო პოტენციურ ვაქცინაზე ჩატარებულმა ფართომასშტაბიანმა ცდამ აჩვენა, რომ ის დაინფიცირებისგან ადამიანების 70%-ს იცავს, - ამის შესახებ ინფორმაციას BBC-ი ავრცელებს.

გამოცემის ცნობით, ეს მაჩვენებელი გაცილებით ნაკლებია Pfizer-სა და Moderna-ს ვაქცინების შედეგზე, თუმცა ოქსფორდის უნივერსიტეტის ვაქცინა გაცილებით იაფია, მისი შენახვაც უფრო იოლია და შესაბამისად, მსოფლიოს სხვადასხვა ქვეყანაში მისი ტრანსპორტირება უფრო მარტივი იქნება.

ვაქცინის კანდიდატზე ჩატარებულ ცდაში 20 000-მდე მოხალისე მონაწილეობდა. ცდამ აჩვენა, რომ კორონავირუსით ვაქცინის ორი დოზით აცრილი 30 მონაწილე დაინფიცირდა, 101 ინფიცირებულს კი პლაცებო ჰქონდა გაკეთებული. მკვლევარების თქმით, ვაქცინის ეფექტურობა 70% -ია.

აღსანიშნავია, რომ გაერთიანებულ სამეფოს ოქსფორდის უნივერსიტეტის მიერ შექმნილი ვაქცინის 100 მილიონი დოზა წინასწარ აქვს შეკვეთილი, რაც 50 მილიონი ადამიანის იმუნიზაციისათვისაა საკმარისი.