ინგლისში, ფეხბურთელის მუხლში კბილები იპოვეს - "გაოგნებული ვიყავი და ექიმს ვეუბნებოდი, თქვენ რა, მეხუმრებით?!“

ბრიტანული კლუბის "კემბრიჯ იუნაიტედის“ ყოფილი თავდამსხმელი, ფეხბურთელი ჯაბო იბირე ამბობს, რომ ის ფეხის ამპუტაციის საფრთხის წინაშე იდგა მას შემდეგ, რაც ექიმებმა მის მუხლში კბილები იპოვეს. ამის შესახებ BBC წერს.

37 წლის იბირეს 20-წლიანი კარიერის განმავლობაში 10 კლუბში აქვს ნათამაშები და ფეხბურთს თავი ახლახანს, ტრავმის გამო დაანება. როგორც BBC წერს, მან გასული წლის ოქტომბერში მძიმე ტრავმა მიიღო, რომელიც თამაშის დროს მეტოქესთან შეჯახებას მოჰყვა.

"ამ დარტყმიდან ორ დღეში ექიმთან მივედი და მეუბნება, აქ, მუხლში რამდენიმე კბილია. გაოგნებული ვიყავი და ვეუბნებოდი, თქვენ რა, მეხუმრებით? მაგრამ არავინ მეხუმრებოდა, იქ ჩემი მოწინააღმდეგის კბილები იყო და სერიოზული ინფექციაც იყო შეჭრილი. მადლობა ფანტასტიკურ ექიმებს იმისთვის, რომ დღეს ცოცხალი ვარ და შემიძლია ამ ამბის მოყოლა“, - ამბობს BBC-სთან ფეხბურთელი.

მას დასჭირდა მუხლზე ოპერაცია, რომლის შემდეგაც ფეხბურთის თამაში ვეღარ შეძლო და იძულებული გახდა, რომ კარიერა დაესრულებინა. ფეხბურთელი თამაშობდა ინგლისის ქვედა ლიგის კლუბებში, ჩატარებული აქვს 677 მატჩი და გატანილი აქვს 138 გოლი.