დონალდ ტრამპის მხარდამჭერები გეგმავენ, 20 იანვარს, ჯო ბაიდენის ინაუგურაციის პარალელურად, ტრამპის ონლაინ ინაუგურაცია გამართონ

აშშ-ის საპრეზიდენტო არჩევნებიდან უკვე თითქმის ორი თვე გავიდა. არჩევნებში "დემოკრატების" კანდიდატმა ჯო ბაიდენმა გაიმარჯვა, მისი გამარჯვება უკვე ოფიციალურად გააფორმა აშშ-ის საარჩევნო კოლეგიამ, არჩეულ პრეზიდენტს გამარჯვება მიულოცეს მსოფლიოს სხვადასხვა ქვეყნების ლიდერებმა, თუმცა შეერთებული შტატების მოქმედი პრეზიდენტი, დონალდ ტრამპი მარცხს დღემდე არ აღიარებს და ამ დრომდე სამართლებრივი დავები აქვს არჩევნების გაყალბებასთან დაკავშირებით.

ტრამპი მიიჩნევს, რომ არჩევნები გაყალბდა. მისი მცდელობები სასამართლოს გზით დაამტკიცოს ყოველივე, ჯერჯერობით უშედეგოა.

არჩეული პრეზიდენტის, ჯო ბაიდენის ინაუგურაცია 2021 წლის 20 იანვრისთვისაა დანიშნული, თუმცა ამის პარალელურად Facebook ჯგუფის საშუალებით ტრამპის მხარდამჭერები ამზადებენ ტრამპის ინაუგურაციის ონლაინ ღონისძიებას, რომელზე დასწრებაზეც თანხმობა უკვე განაცხადა მოქმედი პრეზიდენტის 60 000-მდე მხარდამჭერმა. ამის შესახებ Fox News წერს.

აღნიშნულ ჯგუფში ტრამპის ინაუგურაციასთან დაკავშირებული პოსტები კი Facebook-ის ადმინისტრაციამ ყალბი ინფორმაციის შემცველად მონიშნა.

"აშშ-ის არჩეული პრეზიდენტი ჯო ბაიდენია. 46-ე პრეზიდენტის ინაუგურაციიის ცერემონია 2021 წლის 20 იანვარს გაიმართება“, - აცხადებენ "ფეისბუქის“ ადმინისტრაციაში.

Facebook-ში შექმნილ ჯგუფში გამოქვეყნებული ინფორმაციის თანახმად, ონლაინ ინაუგურაციის მასპინძელი ტრამპის კამპანიის მხარდამჭერი, ევი კოკალარი ანგელაკისი იქნება.

"ჩვენი ხმის უფლებას თავს ესხმიან, ისევე როგორც სიტყვის თავისუფლებას და "ფეისბუქის“ უარიც ჩვენს პოსტებზე ამის დამადასტურებელია“, - ციტირებს გამოცემა "ინდეფენდენთი“ კოკალარის სიტყვებს.

ცნობისთვის, "დემოკრატმა“ ბაიდენმა საარჩევნო კოლეგიის 306 ხმა მოიპოვა, "რესპუბლიკელმა“ დონალდ ტრამპმა კი - 232. პრეზიდენტად დამტკიცებისთვის საარჩევნო კოლეგიის მინიმუმ 270 წევრის თანხმობა იყო საჭირო.

კენჭისყრის შედეგები ვაშინგტონში გაიგზავნა და ხმებს 6 იანვარს კონგრესის ერთობლივ სხდომაზე ოფიციალურად დაითვლიან.

წყარო