"გაზაფხულზე პანდემია რომ დაიწყო, რაღაცების ცხობას შევუდექი... ვცდილობ, როგორც შემიძლია, სხვებსაც დავეხმარო" - ირინა ონაშვილი

მოდელი ირინა ონაშვილი ambebi.ge-ს მძიმედ გადატანილ 2020 წელსა და მომავლის იმედებზე ესაუბრა:

- სულ ვცდილობ და ამას ვამბობ კიდეც, რომ პოზიტიური განწყობა თვითონ უნდა შევიქმნათ. აუცილებელი არ არის რაღაც საოცნებო და განსაკუთრებული სურვილები ავისრულოთ. ნებისმიერი ჩვენ მიერ შექმნილ პოზიტიურ განწყობას თვითონ მოაქვს სიკეთე და სიხარული. გაზაფხულზე პანდემია რომ დაიწყო, რაღაცების ცხობას და კეთებას შევუდექი, მერე ამას ვიღებდი და ვიდეოებს სოციალურ ქსელში ვათავსებდი. მოგვიანებით ამ ყველაფერს რეალისტურად შევხედე, გარშემო ამდენი გაჭირვებული ადამიანია, ეკონომიკური სიდუხჭირეა, პანდემიამ კიდევ უფრო გაუსაძლისი გახადა ბევრის ცხოვრება. ამის შემდეგ რთული აღმოჩნდა პოზიტიური განწყობის შენარჩუნება. თან, ასეთ მძიმე ამბებს ძალიან განვიცდი ხოლმე, თითო მოწერილ წერილში, რომელსაც ვიღებ, ადამიანები დახმარებას ითხოვენ. მოკლედ, აღარ გამოდის, შენს ნაჭუჭში ჩაიკეტო და პოზიტიური განწყობა შეინარჩუნო. ამიტომ, ვცდილობ, როგორც შემიძლია, სხვებს დავეხმარო...

ამ წელმა კი მართლა საშინელებები ჩაიდინა, ბევრი ადამიანი დავკარგეთ, სოციალური სივრცე თითქოს ნეკროლოგად იქცა. ფაქტობრივად, ეს წელი გამოვტოვეთ...

2021 წელს მინდა, ჩვენს ქვეყანას და მსოფლიოს კოვიდის გარეშე ეცხოვროს. მჯერა, შეგვწევს უნარი, ძალები მოვიკრიბოთ, - თუ გავძლიერდებით, გავმაგრდებით, ყველაფერს შევძლებთ იმისთვის, რომ ცხოვრება გავაგრძელოთ. ჩემ გარშემო რაც მეტი ადამიანი იქნება კარგად, ეს ჩემთვის კომფორტი იქნება. ვისურვებ ყველასთვის ჯანმრთელობას და მჯერა, ყველაფერი უკეთესობისკენ შეიცვლება.