აბაშაში, შობის ღამეს, 81 წლის პენსიონერი დააყაჩაღეს და სცემეს - რას ყვებიან მეზობლები

აბაშის მუნიციპალიტეტის სოფელ კეთილარში 81 წლის მოხუცი, შახი გუგუშვილი დააყაჩაღეს. ახლობლების განცხადებით, შეირაღებული თავდამსხმელები მას ფიზიკურად გაუსწორდნენ და 500 ლარი წაიღეს. როგორც „ინტერპრესნიუსს“ შსს-ში განუცხადეს, მომხდარზე გამოძიება სისხლის სამართლის კოდექსის 179-ე მუხლით დაიწყო.

უწყების ინფორმაციით, საგამოძიებო მოქმედებები ინტენსიურ რეჟიმში ტარდება.

"მთავარის" ინფორმაციით, თავდამსხმელები მოხუცს ეუბნებოდნენ, რომ ჰქონდათ ინფორმაცია წინა დღეს მის მიერ საქონლის გაყიდვის შესახებ და ფულს ითხოვდნენ. როგორც მეზობლებმა ტელეკომპანიას განუცხადეს, გუგუშვილმა მათ 500 ლარი მისცა, თუმცა, ყაჩაღებს თანხა ეცოტავათ, დაახლოებით ერთი საათის განმავლობაში მოხუცს ბლაგვი საგნით სცემდნენ და აიძულებდნენ, მეტი ფული გამოეტანა. მათივე ინფორმაციით, გუგუშვილის სახლი თავდამსხმელებმა მას შემდეგ დატოვეს, რაც მოხუცმა გონება დაკარგა. პოლიცია მეზობლებმა გამოიძახეს.

ყაჩაყობის ფაქტთან დაკავშირებით ჯერჯერობით დაკავებული არავინ არის.