ვინ არის კაცი, ვისაც ჯო ბაიდენი ცენტრალური სადაზვერვო სააგენტოს ხელმძღვანელად წარადგენს

აშშ-ის არჩეული პრეზიდენტი ყოფილ დიპლომატს, უილიამ ბერნსს ცენტრალური სადაზვერვო სააგენტოს ხელმძღვანელის პოსტზე წარადგენს, - ამის შესახებ ინფორმაციას Reuters-ი ავრცელებს.

„ბერნსი არის სამაგალითო დიპლომატი, რომელსაც ჩვენი ხალხის უსაფრთხოების უზრუნველყოფის კუთხით ათწლეულების გამოცდილება აქვს მსოფლიო ასპარეზზე. ის იზიარებს ჩემს შეხედულებას, რომ დაზვერვა უნდა იყოს აპოლიტიკური და რომ დაზვერვაში სამსახურის პროფესიონალები მადლიერებასა და პატივისცემას იმსახურებენ. ამერიკელი ხალხი მშვიდად იქნება იმ შემთხვევაში, თუ ბარნსი ცენტრალური სადაზვერვო სააგენტოს დირექტორი იქნება“, - განაცხადა აშშ-ის არჩეულმა პრეზიდენტმა.

აღსანიშნავია, რომ ბერნსი ხუთი, როგორც „დემოკრატი“ ასევე „რესპუბლიკელი“ პრეზიდენტის ადმინისტრაციისა და 10 სახელმწიფო მდივნის დროს, სხვადასხვა თანამდებობას იკავებდა. ის აშშ-ის დიპლომატიურ სამსახურში 33 წლის განმავლობაში მსახურობდა, მათ შორის, ჯორჯ ბუშის პრეზიდენტობის დროს მას რუსეთში აშშ-ის ელჩის თანამდებობაც ეკავა.