Bloomberg: კორონავირუსის საწინააღმდეგო ვაქცინის მიღების შემდეგ 23 ადამიანის გარდაცვალების გამო, ნორვეგიაში მოსახლეობას აფრთხილებენ

ნორვეგიის ჯანდაცვის სისტემის წარმომადგენლები აფრთხილებენ საზოგადოებას, რომ კორონავირუსის საწინააღმდეგო ვაქცინა 80 წელს გადაცილებულ იმ ადამიანებში, რომლებსაც რაიმე დაავადება აწუხებთ, შესაძლოა, ძალიან სარისკო იყოს. ამის შესახებ bloomberg.com წერს.

აღნიშნული განცხადება შესაბამისმა პირებმა მას შემდეგ გააკეთეს, რაც კორონავირუსის საწინააღმდეგო ვაქცინის პირველი დოზის მიღებიდან ძალიან მოკლე პერიოდში 23 ადამიანი გარდაიცვალა.

"ბლუმბერგის“ ცნობითვე, ნორვეგიის მედიკამენტების სააგენტოს ინფორმაციის თანახმად, გარდაცვლილთა შორის 13 ადამიანის აუტოფსიის შედეგად დადგინდა, რომ ვაქცინის გვერდითმა ეფექტებმა შესაძლოა, ხელი შეუწყო ადამიანების გარდაცვალებას.

როგორც "ბლუმბერგი" წერს, ამ დროისთვის ნორვეგიაში 33 000 ადამიანს აქვს მიღებული კორონავირუსის საწინააღმდეგო ვაქცინის ერთი დოზა, აქცენტი ვაქცინაციისას გაკეთდა მოწყვლად ჯგუფებზე და ვაქცინას უკეთებდნენ მედიკოსებს, ასევე მოხუცებს. გამოცემა არ აკონკრეტებს, რომელი ვაქცინა გაუკეთდათ იმ ადამიანებს, რომლებიც ვაქცინაციის შემდეგ გარდაიცვალნენ. ნორვეგიაში კეთდება Pfizer-ის, ასევე მოდერნას ვაქცინები. ზოგადად, აცრილების უმეტესობამ „ფაიზერის“ ვაქცინა მიიღო და არსებული ინფორმაციით, გარდაცვლილები სწორედ აღნიშნული წარმოების ვაქცინით იყვნენ აცრილნი.

ამ დროისთვის მედიისთვის უცნობია გარდაცვლილთა ზუსტი ასაკი, თუმცა როგორც ცნობილია, ისინი ხანში შესული ადამიანები არიან. მიმდინარეობს დამატებით კვლევები გარდაცვალების გამომწვევი მიზეზების ზუსტად განსასაზღვრად.

წყარო: bloomberg.com