დავითგარეჯის საქმე: მელაშვილისა და ილიჩოვას ბრალდების საქმეზე გამოძიება დასრულებულია - რა ჩანაწერებს ავრცელებს პროკურატურა

საქართველოს გენერალური პროკურატურის განცხადებით, უცხო ქვეყნისთვის საქართველოს ტერიტორიების გადაცემის მიმართული მოქმედებების ფაქტზე ბრალდებული ივერი მელაშვილი და ნატალია ილიჩოვას მიმართ გამოძიება დასრულებულია და საქმე თბილისის სისხლის სამართლის სასამართლოს გადაეცა. ამის შესახებ პროკურორმა ამირან გულუაშვილმა ბრიფინგზე განაცხადა.

როგორც გულუაშვილმა აღნიშნა, საქმე ამიერიდან თბილისის საქალაქო სასამართლოში წარიმართება.

„საქართველოს გენერალურმა პროკურატურამ უცხო ქვეყნისთვის საქართველოს ტერიტორიის ნაწილის გადაცემისთვის მიმართული მოქმედებების განხორციელების ფაქტზე ბრალდებულების ივერი მელაშვილის და ნატალია ილიჩოვას მიმართ გამოძიება დაასრულა და საქმე განსახილველად თბილისის საქალაქო სასამართლოში წარიმართება. სისხლის სამართლის საქმეზე ჩატარებული გამოძიების საქმეში ასეულობით საგამოძიებო და საპროცესო მოქმედება ჩატარდა. მოწმის სახით გამოიკითხა 100-მდე პირი, სხვადასხვა სახელმწიფო უწყებებიდან ამოღებული იყო საქმისთვის მნიშვნელოვანი დოკუმენტაცია, მათ შორის, კარტოგრაფიული მასალა.

აქვე კიდევ ერთხელ აღვნიშნავთ, რომ 1937-1938 წლების 1/200 000 მასშტაბის ტოპოგრაფიული რუკის დედანი ჩატარებული საგამოძიებო მოქმედებების შედეგად აღმოჩენილ იქნა ნატალია ილიჩოვას სამუშაო კაბინეტში. აღსანიშნავია, რომ დასახელებული რუკა წარმოადგენს სახელმწიფო საკუთრებას და ნაცვლად ბრალდებულის სამუშაო კაბინეტისა, საქართველოს კანონმდებლობის შესაბამისად, დაცული უნდა ყოფილიყო იუსტიციის სამინისტროს საჯარო რეესტრის ეროვნული სააგენტოს არქივში“, - განაცხადა გულუაშვილმა. პროკურატურამ ასევე გაასაჯაროა საქმეში არსებული ფარული ჩანაწერები.