შესაძლოა დაჯარიმდნენ კომპანიები, რომლებმაც მრიცხველები ვადაგადაცილებით ნახეს, რის გამოც მოქალაქეებმა სუბსიდია ვერ მიიღეს

შესაძლოა დაჯარიმდნენ კომპანიები, რომლებმაც მრიცხველები ვადაგადაცილებით ნახეს, რის გამოც მოქალაქეებმა სუბსიდია ვერ მიიღეს. ამის შესახებ "ინტერპრესნიუსთან" ინტერვიუში საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარე, დავით ნარმანია ამბობს.

მისი განმარტებით, ასეთი რამდენიმე შემთხვევა მოხდა და ფაქტის შესწავლა მიმდინარეობს.

"მასობრივი ხასიათი არ ჰქონია, თუმცა იყო ცალკეული შემთხვევები რამდენიმე უბანში მრიცხველების 2-3 დღით გვიან წაკითხვასთან დაკავშირებით, რის გამოც ზოგიერთი მომხმარებელი მცირედით ასცდა ელექტროენერგიის ნაწილში 200 კილოვატ საათს და გაზის ნაწილში 200 კუბურ მეტს და სუბსიდია ვერ მიიღო. ამასთან დაკავშირებით გამანაწილებელ კომპანიებს მითითებები მივეცით, რომ შესაბამისი კორექტირება მოხდეს.

ჩვენთან შემოდის მოქალაქეების ცალკეული საჩივრები, რაზეც რეაგირება ხდება სემეკის მხრიდან და კომპანიას ეძლევა მითითება. ამასთან, ჩვენთან ამ ფაქტის შესწავლა მიმდინარეობს და არ გამოვრიცხავთ, რომ ამას ზოგიერთი კომპანიის დაჯარიმება მოყვეს" - აღნიშნა ნარმანიამ.

წაიკითხეთ ინტერვიუ სრულად "ინტერპრესნიუსზე"