შარლ მიშელის მხარდაჭერა საქართველოს - საოკუპაციო ხაზთან გადაღებულ რა ფოტოს აქვეყნებს ევროპული საბჭოს პრეზიდენტი "ფეისბუქზე"

რამდენიმე დღის წინ საქართველოს ევროპული საბჭოს პრეზიდენტი შარლ მიშელი ოფიციალური ვიზიტით სტუმრობდა. ვიზიტის ფარგლებში მიშელი შეხვდა საქართველოს პრეზიდენტს, სალომე ზურაბიშვილს, ასევე შეხვედრები გამართა ხელისუფლების სხვა წარმომადგენლებთან და ოპოზიციურ სპექტრთან.

გარდა ამისა, ევროპული საბჭოს პრეზიდენტი პირადად ეწვია სოფელ ხურვალეთში საოკუპაციო ხაზს და ადგილზე საკმაოდ ემოციური განცხადებაც გააკეთა.

"ჩემთვის ძალიან მნიშვნელოვანი იყო, რომ საკუთარი თვალით მენახა ადგილზე არსებული სიტუაცია. სწორედ ამიტომ ვარ აქ. თქვენ იცით, რომ ევროკავშირი საქართველოს სუვერენიტეტს და ტერიტორიულ მთლიანობას მხარს უჭერს. ასევე ძალიან მნიშვნელოვან როლს ასრულებენ ამ საკითხში ევროკავშირის სადამკვირვებლო მისიის წარმომადგენლები იმისთვის, რომ რაც შეიძლება მეტად შეინარჩუნონ სტაბილური ვითარება ადგილზე.

ჩვენ ვიცით, რომ ვითარება არის საკმაოდ კომპლექსური და რთული ადგილობრივი მოსახლეობისთვის, ამიტომ ჩემთვის ძალიან მნიშვნელოვანია ადგილობრივებს ვუთხრა, რომ თქვენ მარტო არ ხართ, ევროკავშირი ყველაფერს აკეთებს მშვიდობის, სტაბილურობისა და უსაფრთხოებისთვის", - აღნიშნა მიშელმა.

ამჯერად კი ის "ფეისბუქის" ოფიციალური გვერდის გარეკანზე საქართველოში, საოკუპაციო ხაზთან გადაღებულ ფოტოს აქვეყნებს. სურათზე შარლ მიშელის უკან საქართველოსა და ევროკავშირის დროშები ჩანს. ფოტოს ქართველების მხრიდან ემოციური კომენტარები მოჰყვა, ჩვენი ქვეყნის მოქალაქეები ევროპული საბჭოს პრეზიდენტს ამგვარი მხარდაჭერისთვის მადლობას უხდიან.