"მე, კრიმინალი და მოძალადე..." - როგორ ეხმაურება ფარულ აუდიოჩანაწერებში ნახსენები ამიკო ბერას ინტერვიუს

რამდენიმე დღის წინ გავრცელებულ ფარულ აუდიოჩანაწერებში მომღერალ ბერა ივანიშვილის მიერ ნახსენები ამიკო, მისი მეჯვარე და შვილის ნათლიაა.

"ვინ არის ფარულ ჩანაწერებში ნახსენები ამიკო?", - წერს ამიკო ჯანელიძე "ფეისბუქის" პირად გვერდზე "ქრონიკა +"-ის სათაურს და გაზეთით ხელში გადაღებულ ფოტოსაც აქვეყნებს.

ჯანელიძე "იმედზე" გასულ ბერას ინტერვიუსაც ეხმაურება, სადაც მომღერალმა ამიკოს შესახებაც ისაუბრა და რეპერის სიტყვების ციტირების შემდეგ, ბერასთან ერთად გადაღებული ფოტოს აღწერაში წერს: "მე, კრიმინალი და მოძალადე".

"როგორ გავამტყუნო ჩემი ძმაკაცი, ჩემი მეჯვარე ამიკო, რომელიც გამოიყვანეს ლაკი ლუჩიანო თუ პაბლო ესკობარი, რომ ის უახლოესი მეგობარი, ჩვენს ოჯახში არაერთხელ ყოფილა, უცებ ინტერნეტში ვიღაც გიჟის ნაწერს კითხულობს ჩემს დედიკოზე, ის ამაზე რეაგირებას აკეთებს, მე კი არ გავამტყუნებ, მეც იგივეს ვიზამ ნებისმიერი ჩემი ძმაკაცის დედაზე, რომ ვნახო მსგავსი სიტყვები, მეც იგივეს ვიზამ და თავს ვერ შევიკავებ. როგორ შეიძლება აქ მე ჩემი ძმაკაცი გავამტყუნო ამ შემთხვევაში", - თქვა ბერა ივანიშვილმა "იმედზე" გასულ ინტერვიუში.

ცნობისთვის, ამიკო ჯანელიძე წლების წინ საკმაოდ პოპულარული რეპერი გახლდათ. მისი სიმღერა "მე არ დაგანებებ თავს", თინეიჯერებს განსაკუთრებულად მოსწონდათ. თუმცა რეპის სამყაროში ბერა ივანიშვილის გამოჩენის შემდეგ ძალიან მალე ამიკომ საკუთარ კარიერაზე უარი თქვა და მილიარდერის შვილის სხვადასხვა პროექტებში დასაქმდა.

ამიკოს ჰყავს მეუღლე და სამი შვილი. რეპერის ერთ-ერთი ვაჟი ცოტნე ივანიშვილის მეგობარია და ხშირად სტუმრობს ივანიშვილების სასახლეს. ამიკო ჯანელიძე ბერას მეჯვარე და შვილის, ბერუკას ნათლიაა. ამჟამად „ბლექსი არენას“ დირექტორის მოადგილის პოსტს იკავებს. ის ყველგან თან ახლავს ბერა ივანიშვილს და დიდ დროს ატარებს შეკვეთილში ივანიშვილების რეზიდენციაში.